مريم

شهرين و يوم

شعور غريب

الامومة مش مجرد شعور بالحنان

هي حاجة كدا مش عارفة بتطلع منين

مريم

كأني اعرفك من زمان اوي

مع انك يادوب كملتي شهرين و يوم

بنت يا مريم

نورتي الدنيا

من زمان اوي

مش مجرد من شهرين و يوم

خلافات زوجية!!

من اسبوعين تقريبا و الحاجة الوحيدة اللي كانت بتفكر فيها هي الطلاق!!

اه عشان مابقيوش زي الأول، كل واحد فيهم اتعلم يقسى على التاني.

الست دي مخلوق اهبل والله.. و بكلمة واحدة ممكن تتصلح حاجات كتير متكسرة، بس لما الكلمة دي ما تتقالش، بتتحول لمخلوق احمق و تختار الانتحار بعدا عن الحبيب

خلاف بسيط زي اي خلاف بين اي زوجين، مش مهم تفاصيله، المهم انه كان خلاف راقي. يعني لا صوت عالي ولا صراخ ولا حاجة

هي اختارت تبعد شوية بأدب، يعني لا هاتسيب البيت ولا حاجة كل الموضوع هايبقى الكلام على القد و بس، اكتر من كدا مافيش

هو سألها اول يوم مالك، قالت له تعبانة شوية

تاني يوم مالك، تعبانة شوية و مش قادرة اتكلم

تاني يوم قالتله بابا و ماما جايين يزورونا ،قالها انا ماشي و لما يمشوا كلميني او ابعتي لي ماسيج!!

ساب البيت و راح لأخوه

هي اتضايقت و كانت مش عارفة توجعه ازاي على الحركة دي

عشان هم كانو متفقين ان لو بينهم مصانع الحداد خلاف، ما حدش في الكون يعرف، و بعدين دا هي اللي زعلانة هو بيقلب الطرابيزة دلوقت عليها ؟

طيب.. و قررت انها مش هاتقوله ان ابوها و امها مشيو، و خليه في الشوارع

و تاني يوم رجع ما كلمتوش، وهو ما حاولش يكلمها

الشيطان فضل يقولها دا انسان اناني هو لو بيحبك كان قدر ظروفك الصحية و ضغط الشغل و هو لو بيحبك ما كانش سمع كلمة مامته لما قالت كدا مع انه عارف انه ما ينفعش وفكري كدا و دوري جواكي على اي حاجة هو عملها عشان يسعدك زي ما انتي بتسعديه مش هاتلاقي اي حاجة عشان تعرفي انه اناني

و هو فضل يفكر صاحباتها في الشغل غيروها و علموها تلوي بوزها في البيت، فين زمان اما كانت تيجي تصالحك و تقولك انا ما اقدرش انام و انت زعلان، اهي بتنام و بتشخر دلوقت و انت اتفلق، انت لو سمحتلها المرة دي انها تكسبك انت الخسران طول عمرك

الستات دول عايزين كسر ضلوعهم..

هي في اوضتها بالليل تفكر و تصعب عليها نفسها اوي و تعيط اوي اوي، و كل ما تسمع صوت تسكت و تقول اهو جاي يصالحني

وتعيط و تعيط

و تقوم الصبح تعبانة اوي و تروح المستشفى مع صاحبتها، و يقرروا يقعدوها في المستشفى يومين عشان اصلها حامل و الضغط عالي و غلط على الجنين

تقرر انها مش هاتقوله و تقول لصاحبتها قولي له اني مش عايزاه يجي لو سمحتي عشان لو جه مافيش عندي طلب غير ان كل واحد مننا يروح لحاله باحترام

لو سمحتي قولي له لو باقي عليا يسيبني لما ارتاح شوية

هو يتصل بيها مرة اتنين تلاتة ماتردش

و الشيطان يقولها على فكرة دا قلقان بس لحسن الناس تلومه، و هو خايف على ابنه مش عليكي انتي، فاكرة لما كنتي بتشتغلي في البيت و تعبتي و قالك لو انتي بطولك انتي حرة في نفسك بس انتي شايلة ابني

اه يبقى هو خايف بس على ابنه

تنام و تغمض عنيها و تسمع صوت خبطته على باب الاودة في المستشفى

تقرر انها اول ما تشوفه توجعه اوي و تقوله طلقني ، خليه بقى يعرف يعيش من غيرها

تسمع خطوات رجليه، و تقول مش هاعيط قدامه دا انسان اناني ما يستاهلش، خليه يندم طول عمره انه قسي عليا

تلمح ملامحه

تعيط اوي، و تشنهف اوي

يقولها والله انا اسف بس انتي غلطانة لما انتي زعلانة مني كلميني

قالتله و انت من امتى بتسيبني زعلانة كدا

انتي بقيتي حساسة اوي

انت بقيت قاسي اوي

خلاص انا اسف يا ستي، و ادي وردة عشان خاطرك ولو انك عارفة اني ما باحبش الورد

تضحك اوي من قلبها، قالتله و لاففها في ورقة جرنان كمان

مسح دموعها

لا بس انت غلطان انا اللي كنت زعلانة و انت تحرجني و تسيبني قدام بابا و ماما و انت عارف اني ما احبش حد يعرف عني حاجة

ششششش خلاص مش هايحصل كدا تاني بس انا كنت متعود يعني ان عمر ما خلاف بيننا يدوم كدا

مهو انت لو كنت جيت اخدتني في حضنك و خليتني اشتكيلك منك و اعيطلك الدمعتين اللي عندي كنا خلصنا.. انت عارف ان ماليش غيرك

و من غيرك باحس اني مكسورة

ماعنديش حد اشتكيله منك غيرك، بس ماكنتش قادرة اتكلم

وانتي عارفة اني عنيد و غبي. بس عارفة اني ما اعرفش اعيش من غيرك ،

و حضنوا بعض

و قالتله وحياتي عندك ما تقسى عليا تاني

و خلصت الخناقة

اللي سببها مش معروف و مش مهم يتعرف

بس اللي لازم يتعرف

ان بكلمة واحدة و لمسة واحدة بيوت كتير بتعيش !!

تغيير

للاسف اكتشفت اننا بنضيع كتير من عمرنا في انتظار تغيير ما يحدث في حياتنا
تغيير في ناس بنحبهم بس فيهم عيوب
تغيير في اوضاع مجتمعية
تغيير في اوضاع مادية
تغيير في اي حاجة
المهم تغيير
احيانا بيكون الاسهل ان التغيير يكون مننا احنا
بدل ما نستنى
و نسمع وعود
و نشوف دموع
و نوصل لمرحلة اليأس من التغيير
و دا بيولد جوانا الاحباط
و بيجيب لنا اكتئاب
و بيخلينا في حالة رفض للواقع
مع اننا مش متأكدين لو التغيير دا حصل حياتنا هاتكون احسن
يعني مش اكيد الاغنى احسن
ولا الاهدى في العصبية احسن
ولا الاقرب احسن
ولا الاكبر احسن
ولا الاوسع احسن
ولا اي حاجة على صيغة افعل احسن
يمكن يكون الواقع احسن بس نعرف نعيشه، بدل ما احنا عايشين على امل المش موجود
و بنعلق اخطاءنا و يأسنا و احباطنا على شماعة لو يحصل كذا، لو يبقى عندي كذا، لو يجرى كذا

دلوقت اكيد احسن لان دلوقت في ايدينا
بس يا ريت نلحق نعيش!!

هابي عيد ثورة

طبعا زي ما انتو عارفين والعارف لا يعرف ان امبارح فيلم السهرة و كل سهرة كان فيلم رد قلبي بتاع علي و انشي، و ابوهم الجنايني
تبقى المناسبة السعيدة علينا جديدة هي ثورة تلاتة و عشرين يوليو و مصر اليوم في عيد مصر اليوم في عيد هيييه
اوم ايه بقى علي و انشي اتجوزو بعد ما الضباط الاحرار كوشوا على فلوس ابو انشي و قتلوا تقريبا الواد اخوها البرنس بس سابو لإنشي شوية مكوهرات اشكمنها تبع الواد علي ابن الجنايني
و عادي بقى انشي مش عندها حكد طبكي من اللي عند الناس و اتجوزت علي بعد ما ولعت الولية الرقاصة في حريق القاهرة اللي اكتشفوا ان سببه كان ماس كهربائي عمله واحد مجنون تبع تنظيم الاخوان المسلمين المتطرف الارهابي
جم الضباط الاحرار و قالوا تحيا مصر و خرج الشعب في الشارع و عم الحج الجنايني اللي كان اتشل من ابو انشي لما راح يخطب انشي و سمعه كلمتين في جنابه، المهم عم الجنايني خف من الشلل و قال معاهم تحيا مصر و اخو علي اتجوز بنت خالته الهبلة
و بعد ما الضباط الاحرار عملوا الشوية بتوعهم و خرجوا الحقد الطبقي اللي متغلغل في قلوبهم قعدوايقسموا التركة و اللي اخد قصر على النيل واللي اخد مجوهرات واللي اخد السلطة
يمكن كان في فيهم ناس نواياهم طيبة بس النتيجة اللي احنا شافينها دلوقت اكيد مش كويسة، لما كان الحكم بيتورث اهي اسمها مملكة و الملك حر، لكن دلوقت الحكم هايتورث ولاحدش هايقدر يفتح بقه و مهياش مملكة
زمان البشوات كانو ولاد ناس مأصلين، لكن دلوقت البشوات يا اما الهليبة والنهيبة اللي ماصين دم الشعب او ضباط الشرطة اللي تييييييييييييييت الشعب
زمان كان في احزاب على الرغم من انها كانت ملكية، و كان ممكن الناس تهتف سعد سعد يحيا سعد مع ان الملك ما اسموش سعد، و لما كانو بيهتفوا باسم سعد الملك ماكانش بيجيب سعد و يحطه في السجن ويروح اللي هتفوا في فندق ما وراء الشمس و يطلع عين ام اللي خلفوه
زمان كانو بيقولوا لو لم اكن مصريا لوددت ان اكون مصريا، دلوقت بيقولوا لو لم اكن مصريا لوددت ان اكون اي حاجة
زمان كان في تعليم، و كانت جامعة الملك فاروق جامعة فارقة في حياة الشعب
دلوقت الجامعات المصرية كلها لا تخرج الا المعاتيه الفاشلين، الا من رحم ربي و ببركة دعا الوالدين او يكون له حد في هيئة التدريس او حد من اهله من البشوات او البهوات

زمان اتحرقت القاهرة و قامت الدنيا و لم تقعد

دلوقت الحرايق دي سمة عادية في بلدنا و المطافي على بعد خرطوم ولا حياة لمن تنادي

زمان كان في اراضي زراعية على الرغم من انها كانت تبع الاقطاع، دلوقت الاقطاع موجود برده والاراضي الزراعية بح عشان بيبنوا عليها ملاعب جولف

زمان كان للعلم تمن، دلوقت العلم بقى يكيل بالبرنجان

زمان كانت مملكة بيحكمها ملك
دلوقت بقت تكية بيحكمها ولاد التييييييييييييييييييت

كفاية كدا والنبي لحسن هاطق
هابي عيد ثورة

قال بيقولك و إسلاماه قال..

قال بيقولك ايه يا خويا، في حرب زمان قامت بين المسلمين و بنو قريظة عشان قال ايه واحدة من المسلمين حاول واحد من اليهود رفع ثوبها فقالت و اسلاماه قام واحد مسلم في السوق قتل اليهودي فورا

فقتله اليهود فقامت الحرب و انتصر المسلمون على بنو قريظةوالنبي مش نكتة.. ..

قال حرب قال، طب دا احنا دلوقت بنتقتل و نتدبح و دمنا بيضيع هدر من غير ما حد يرفع حواجبينه مستاءًا و يقول يا حرام

بس اعتقد ان في فرق بين المسلمين زمان و دلوقت، الا و هو انه زمان كان عندهم خير اللهم اجعله خير إباء و عزة و كرامة و نصرة للإسلام و إيثار و يحبوا الله و رسوله اكثر من محبتهم لأنفسهم، حاجات كدا ما نوعاش عليها، يعني يادوب نسمع عنها في قصص السيرة او الاساطير

احنا بقينا رخاص اوي اوي اوي

ولاعادش لينا غير الشعور بالقهر!!

صباح الخير

صباح الخير،

يوم جديد يمر، أحياناً يكون من المؤلم جداً أن تستيقظ و ترى وجهك في المرآة

دون تلك الرتوش، التي تجعل الحياة قابلة للعيش فيها

و من الأكثر ألماً، أن تكتشف أن الحياة ليست كما كنت تظن أنك تعيشها..

أنت مجرد كذبة، تحيا لمجرد وهم،،

تكتشف أنك لست ذاك الإنسان السعيد، المثالي، الذي يقطر فرحا مع كل نفس..

تكتشف، أن العالم لا يراك كما ترى نفسك،

تضغط زر الغضب، فينفجر في وجهك بركان يجردك من كل مزاياك,,

لترى نفسك بأقبح صورة،،

تنام على أمل أن تستيقظ من الحلم،

لكنك لا تستيقظ

ترى ملامح الآخر أمامك، تندهش، كيف أنه لا يراك

كيف أنه لا يحفظ ملامحك عن ظهر قلب

كيف أنه ليس هو، أو ليس كما أردت

كيف يقتلك
، و ينام
، و يستيقظ
يبتسم
و يطبع على جثمانك قبلة
و يقول صباح الخير!!

الحكم في قضية هشام طلعت مصطفى.. معقول؟

القضاء المصري يحكم بالإعدام على هشام طلعت مصطفى والسكري في مقتل سوزان تميم

معقول، لسة في امل يعني

يعني مش هايهرب مش هايجيب حد يشبهه مكانه مش حاجة؟

يعني دا بجد

يعني لسة عمار يا مصر؟؟؟؟؟

انا مش عارفة اكتب

ببساطة دي حالتي

انا مش عارفة اكتب

احداث كتيرة عظيمة مرت عليا، و تعليقات كتيرة بتيجي على بالي بس مش عارفة اكتب

الأول ما كانش عندي وقت

لكن دلوقت انا عندي وقت، بس مش عارفة اكتب

فقلت اكتب اني مش عارفة اكتب يمكن النحس يتفك و اقدر اكتب تاني

عموما اخباري على السريع

طبعا يوم تلاتة خمسة اليوم التاريخي كان يوم عيد ميلادي، و طبعا انا كملت خمسة و عشرين سنة و ستة و تلاتين شهر بس

و ايه كمان ايه كمان

حالاتي النفسية كالعادة حبة فوق و حبة تحت

شوية و هارجع تاني

سرحان ونفيسة

انا مش عايزة ارغي كتير انهاردة
بس هو مجرد استفسار بسيط
ليه سرحان عايش مع نفيسة ؟
مهو ممكن يطلقها و يخلص
ليه هدفه الوحيد انه يقتلها
واضح ان مافيش بينهم وفاق
بغض النظر عن ان نفيسة تبدو هبلة
و مش بتاخد رد فعل على اللي بيحصل كله
عايشين مع بعض ليه
ازاي تكون الحياة بين اتنين واحد فيهم عايش على امل موت التاني
و هو دا يبقى زواج
و نفيسة الهبلة مافيش مرة سألت نفسها هو بيعمل معايا كدا ليه
و ليه مستمرة معاه هي كمان
واحد مرة يحطها في صندوق ولا يرميها من براشوت ولا يقفل عليها البلكونة
اكيد مش بيدوب في دباديبها
لو المشكلة الشقة، تغور
لو المشكلة المؤخر يغور
بس ما تبقاش الحياة بس في انتظار نجاح محاولة قتل نفيسة

و نصيحة لكل اتنين متزوجين
لو تمنيت في لحظة الحياة بدون شريكك
تبقى الحياة محتاجة وقفة


الى العاملين على موضوع سرحان ونفيسة
حسبي الله ونعم الوكيل!!

جبنة بطماطم

يوم اجازة و جوزي قرر انه يطلع هو و صاحبه

مع الف سلامة مهو الواحدة مننا بردو محتاجة نفس .. بريك

و لأول مرة مش هاقلق من الكابوس اليومي بتاع هانتغدى ايه انهاردة

و انا زهقت من اكل برة، و مش عايزين اكل دسم عايزين خفيف و مرة نفسي في محشي و مرة ايه رأيك تعملي لنا صينية مكرونة بالباشميل كدا على السريع

قال ايه المكرونة بالباشميل بقت على السريع

الله يسعد ايامك يا امي كنا بنغسل وراها مواعين المطبخ كلها يوم المكرونة بالبشاميل دا

المهمممممم بعيدا عن كل الصداع دا

انا حرة، و لو ليوم واحد

اكل اللي نفسي فيه

و بما اننا جينا عند نفسي، فأنا لا اعشق في حياتي حاجة زي

الجبنة بالطماطم

يم يم يم

في الصيف ترطب وفي الشتا تدفي

حاجة لا يمكن حد يقول ما بيحبهاش و لو حد قال كدا يبقى ما بيفهمش

المقادير:

حتة جبنة بيضا اي نوع تحبه و تحديدحجمها انت و طفاستك.. اقصد انت و جوعك

و شوية طماطم و انا شخصيا بافضل الطماطم تكون كتير

و بلاش عبط و تروحو تجيبوا طماطم خضرا زي بتاعة السلطة

والجبنة التلاجة ما تنفعش مع الطبق دا

لالالا مش هاتنفع

طماطم حمرا مستوية و كلها عصارة

سلطانية غويطة

شوكة، و لو انت بس اللي هاتاكل مش محتاج

رغيفين

حط الجبنة في السلطانية، واهرسها شوية بالشوكة

وابتدي قطع عليها الطماطم، مش مهم على قطاعة الخضار، و مش مهم كبيرة ولا صغيرة، و مش مهم تكون قطع متساوية

المهم في الطبق دا .. الشغف،

ممكن ناس تضيف زيت وناس تضيف شطة وناس تضيف خيار او فلفل..

لالالا

بالنسبة لي الطبق هو الجبنة بالطماطم بس..و تناغم الجبنة بالطماطم

خلصت تقطيع الطماطم

قلبها بطراطيف صوابعك مع الجبنة، يا ريت بتلات صوابع بس عشان تعرف تلحسها بعد ما تخلص

ادعك الطماطم مع الجبنة شوية لحد ما قوام الجبنة يخف و ما يبقاش في كتل، تبقى زي الكريمة كدا تدوب في البق

ممكن تاكل حتة طماطم مع شوية جبنة عشان تدوقهم

يا سلام، تسلم ايديك، ولا اروع برامج الطبخ

اشطف ايدك، هات صينية، حط العيش والسلطانية و صب لنفسك كوباية شاي سكر زيادة

في ناس ممكن تحب الشاي بحليب، بس انا باحب الشاي.. كشاي بس

روح اقعد قدام التلفزيون، هات برنامج بتحبه

اضحك حتى لو مافيش داعي، اومال هاتضحك امتى اذا ماكنتش هاتضحك و انت بتاكل جبنة بطماطم

اشرب شوية شاي

خلي بالك قبل ما الطبق يخلص، خلي اخر لقمة من العيش صغيرة بالنسبة لحتة الجبنة المتبقية في الطبق

عشان تبقى اخر لقمة فيها جبنة كتير

عشان حلاوة الطبق ان اخر طعم في بقك يكون الجبنة بالطماطم

بعد ما تخلص هايتبقى شوية جبنة سايلين في الطبق

بصوباعك و الحسهم

الطبق دا ما ينفعش يتبقى منه حاجة

خالص

كمل كوباية الشاي

كمل برنامج التلفزيون

و بالهنا والشفا

نصيحة اخوية عشان ماحدش يدعي عليا

لو خاطب او خاطبة اوعوا تاكلو جبنة بطماطم قدام الشريك المستقبلي ليطفش

الطبق دا مصمم بطريقة انا وانت ولا حد تالتنا

لو بتحب شريك حياتك اوي. سيبه يوم في الاسبوع بحريته عشان ياكل جبنة بطماطم

الطبق دا بيبقى مايع لو اتعمل سندوتش

بالهنا والشفا

انتظار

بين اسوار عزلتي والهاتف المعطل على ارض احلامي

اروح جيئة وذهابا

لازال عندي امل

رغم اني فقدت قدرتي على الكلام

تظل انت هناك بين شرايين الألم

حاولت اقناع نفسي بأن الحب هو وهم

نقنع به انفسنا لنتألم

تظل انت الألم في غياهب الروح

تذهب الايام وتأتي

وحينما يتردد اسمك

ترتعش اطراف اصابعي

ليس لأني افتقدك

ليس لأني احببتك

ليس لأني بكيت يوم رحلت

علاقة متشابكة هي تلك التي تربطني بآلامي عموما

انا امرأة لم تعرف الهزيمة

لم تعرف البكاء

لم تعرف

لم تعرف ما تريد

لماذا انتظرك رغم اني اعلم علم اليقين

انك لست لي

انك لن تتصل

اني لن استقبل اتصالك

صدقني صدقني

انا لم احبك ابداَ

فلا داعي للألم

صدقني

لاداعي للألم!!

سؤال عبقري

مش عارفة موضوع تساؤلاتي دا ايه

و زي ما هاتلاحظوا دلوقت انا مش هاتعرض لمواضيع سياسية تاني

انا خلاص نويت اتوجه للفلسفة، لذا ايها الفلاسفة لموا عزالكو نيران هانم كعب الغزال قد نوت ان تغزوا مجال الفلسفة

و انتو مش عارفين نيرو لما تتفلسف بقى

يا خرااابي

يعني اللي مش عامل دماغ هايعمل، اللي عامل هايفوق

و أول تساؤلاتي الفلسفية

عن سؤال ازلي، السؤال يقول

البحر بيضحك ليه و أنا نازلة اتدلع املى القلل

الكل بيتساءل البحر بيضحك ليه، و ما حدش فكر يفكر في اجابة

يا ترى البحر بيضحك ليه؟ يمكن عشان اللي بتغني كانت نازلة تملى القلل من البحر، و البحر كما نعلم مياهه مالحة فالبحر اكتشف انها عبيطة؟

فيا ترى هي كانت بتتدلع ليه و هي نازلة تملى القلل

يبقى كان في واحد بيطل عليها و هي حبت تتدلع عشان توقعه فمنظرها كان مش هو قدام البحر عشان كدا ضحك عليها

ولما هي شافت البحر بيضحك وهي نازلة تتدلع تملى القلل ما فكرتش ليه و سألت الناس، طب ما تسأل البحر ليه السؤال موجه للناس كلها

عشان الناس تفضل تفتكر انها كانت بتتدلع و هي نازلة تملى القلل

و بعدين ليه تاخد القلل تملاها اصلا، ما هم كانوا بيشيلوا زلعة على راسهم، و بيملوا فيها المية كلها و بعدين تروح تملى القلل في البيت

دي كلها اسئلة منطقية، وواضحة وضوح الشمس، بس طبعا لم يتطرق إليها أحد إلا أن الفيلسوفة :)

و دي كل الأغنية، محمد منير غناها حلو اوي، مع ان اكيد محمد منير ماكانش نازل يتدلع يملى القلل، و لو دا حصل يبقى اكيد البحر لازم يسخسخ على روحه من الضحك، أومال ايه

البحر بيضحك ليهو انا نازله ادلع املى القلل

البحر غضبان مبيضحكش

اصل الحكايه متضحكش

البحر جرحه ما بيدبلش

و جرحنا و لا عمره دبل

والبحر بيضحك ليه وانا نازله ادلع املى القلل

قوللنا فخرها قناوى

بتقول حكاوى وغناوى

يا قله الذل انا ناوى

ماشرب ولو فى الميه عسل

والبحر بيضحك ليه

وانا نازله ادلع املى القلل

مساكين بنضحك م البلوه

زى الديوك والروح حلوه

سرقانا م السكين حموه

فى القلب بدل العله علل

والبحر بيضحك ليه و انا نازله ادلع املى القلل

بينى وبينك سور ورا سور

و انا لا مارد ولا عصفور

فى ايدى ناى والناى مكسور

وصبحت انا فى العشق مثل

البحر بيضحك ليه و انا نازله ادلع املى القلل

فى بالى ياما وعلى بالى

واللى بيعشق ما يبالى

ميهمنيش من عزالى

ياحلوه لو مرسالى وصل

والبحر بيضحك ليه و انا نازله ادلع املى القلل

لو عندكو اي اجابات عن موضوع البحر بيضحك ليه ممكن تبعتوها لنا هنا

و إلى لقاء في تساؤل فلسفي تاني

متى يموت حسني مبارك

اه.. كدا و عيني عينك

و بدون مناسبة

صحيت الصبح طق في دماغي السؤال

و بصراحة كنت ناوية اكون اكثر جرأة واكتب عنون البوست ان توووت توووت مات

بس قلت لا لحسن يقبضوا عليا ولا حاجة و خليت الموضوع مجرد تساؤل بريء من طفلة بريئة

هو بصوا لا اعتراض على قضاء الله

والحمد لله على ما كتب علينا

بس يعني هو مش هايموت بقى

مش مشكلة مين هيجي بعده، طز

بس مجرد تغيير

انا من ساعة ما وعيت على الدنيا من احم خمسة وعشرين سنة و هو ريس

ايوووة خمسة وعشرين سنة والي يقول غير كدا ينطس في كي بورده

المهم يعني انا نفسي كدا نغير نعمل نيو لوك رئاسي

و بما اننا مش قادرين نمشيه يبقى نستنى ربنا ياخده

و على رأي اللي قال

اصبر على جارك الحلووووو يا يغور يا تيجي داهية تاخده

فكركو انا خايفة، إطلاقا ابسلوتلي

لو حد قبض عليا هاقول ان الموضوع وما فيه ماس كهربائي في نافوخي أدى إلى حدوث تخبط في الجهاز السمبثاوي والبارا سمبثاوي

طب تخيل كدا

تصحى الصبح في يوم مشمس جميل ، تفتح الراديون تلاقي قران كريم ومارشات عسكرية و زغاريط

ااقصد وصويت

و بعدين تبص من البلكونة تلاقي يفط كتير متعلقة

محمد قشطة ينعي توووت تووووووت

و ناس ماشية في الشارع بتضحك و تزغررررررط

و ناس راكبة عربيات هاي هاي بتعيط و حاطة فيونكة سودة على الكرافاته

و ناس متنحة كالعادة

و تنادي على عم عبده بتاع الكبدة و هو جنب عربية الكبدة بتاعته تقوله يا عم عبدو في ايه

يوشوشك بالراحة و يقولك غاااااااااار

غااااااااااااااااااااااااااااااااااار

بس بالراحة بردو

و الشرطة مستخبية في الاقسام خايفة من اللي هايجرى

و الستات واقفين في البلكونات يمصمصوا شفايفهم و يقولوا ياختي اهو خد الشر و غار

و ناس منافقين عاملين حساب ان ابن توووووت تووووووووت ممكن يمسك او اكيد هايمسك فهيولع في اللي هايقول حرف واحد على ابوه

و قاعدين يقولوا بيانات صحفية في الشارع

شعورك و انت بتفتح البلكونة الصوبح كدا هايكون ايه؟

هاتعمل ايه

فكر و جاوبني

و لو اتقبض عليك انا ماليش دعوة

عشان هو لو مات انا هاعيط عليه

اوي

حتى بصوا

سلام

فبراير!!

مش عارفة سبب معين للتدوينة دي.. بس على الرغم من ان فبراير دا اقصر شهور السنة.. إلا إنه بيطول أوي

عشان كدا طقت في دماغي اجوجل فبراير.. اللي امي بتسميه فأراير.. شهر قصير بس طويل

وما اعتقدش الموضوع له علاقة بالنظرية النسبية بتاعة الحاج اينشتاين

بس اهي دي المعلومات اللي عرفتها عن فبراير

يمكن حد زيي عايز يعرف هو مين فبراير

فبراير هو الشهر الثاني في السنة في التقويم الجريجوري وهو أقصر الشهور الجريجورية والوحيد الذى يبلغ عدد أيامه 28 أو 29 يوما. ويكون الشهر 29 يوما في السنة الكبيسة، وذلك في السنين التى يمكن قسمتها على أربعة (فيما عدا السنين التى يمكن قسمتها على 100 وليس على 400). وفيما عدا ذلك فإن الشهر 28 يوم، تستعمل هذه التسمية في مصر والسودان وبعض بلدان الخليج في حين يسمى شباط في بلاد الشام والعراق من جذر شبط السّرياني الذي يُفيد الضرب والجلد والسَّوط ، أو يفيد الهبوب الشديد للرياح و فيفري في تونس والجزائر.
يبدأ فبراير(في علم التنجيم) عندما تكون الشمس في برج الجدى وينتهي في برج الدلو . وفلكيا عندما تبدأ الشمس في برج الدلو وتنتهى في برج الحوت.
تم تسمية الشهر على على اسم فيبروس "Februus", إله النقاء الروماني. وقد كان يناير وفبراير أخر الشهور التى تمت إضافتها للتقويم الروماني, فقد إعتبر الرومان أن الشتاء فترة لا تحتوي على شهور. وتقريبا في عام 700 قبل الميلاد قام رومولوس خليفة الملك نوما بومبيليوس بإضافة الشهور يناير وفبراير ليصبح التقويم مساويا للسنة القمرية. وقد كان فبراير حسب ما إقترحه نوما يحتوى على 29 يوم (30 يوم في السنة الكبيسة).ولكن أغسطس قام بحذف يوم من شهر فبراير ووضعه في شهر أغسطس (والذى تم تسميته كذلك للشهر تكستاليليس) وذلك لتمجيد إسمه, بحيث لا يحتوى شهر يوليوس قيصر يوليو على أيام أكثر.وعموما فهناك إثباتات تاريخية لهذا الأمر.
وقد كان فبراير في الأصل أخر الشهور في التقويم الروماني, حيث كانت السنة تبدأ في مارس. وفى فترات معينة قام القساوسة الرومان بإضافة شهر ميرسيدونيوس لربط السنة بالفصول.
الأسماء التاريخية لفبراير تتضمن شهر الشمس "Solmoneth" باللغة الأنجلو-الساكسونية. وشهر الكرنب "Kale-monath" حسب تسمية شارل الأعظم. وفى التقويم الياباني القديم, يطلق على الشهر كايزاراجي (如月, 絹更月 أو 衣更月). كما انه أحيانا يسمى مومتسوكى (梅見月) أو كونوميتسوكي (木目月). وفى اللغة الفنلندية يسمى هيلميكو "helmikuu" أى شهر اللؤلؤ.
وقد ينطق فبراير بدون الراء الأولى في بعض اللغات "فباير". وقد يكون هذا من باب التشابه مع الشهر يناير

30 فبراير وقع ثلاث مرات فقط في التاريخ.
في السنين البسيطة يبدأ فبراير في نفس اليوم من الإسبوع مثل مارس ونوفمبر, وفى السنين الكبيسة يبدأ في نفس اليوم من الإسبوع مثل أغسطس.
زهرة فبراير هى القرنفل.
حجر فبراير هو الزمرد.
مواليد شهر فبراير إمابرج الحوت أو برج الدلو.

و بس خلاص

علامة استفهام صغيرة قد كدا

افرجوا انهاردة عن ايمن نور

عادي بلد ديموقراطي

الموضوع مافيهوش مؤامرة و الراجل في لقاؤه مع كل من منى الشاذلي و عمر اديب قال انا ماحدش ساومني!

الراجل كويس و مش متضايق و مش متنرفز

مافيش اي ضجة قبل الاعلان عن افراجه

علامة الاستفهام بقى

الحكومة عايزة تلهي الرأي العام عن ايه؟

بيدبروا ايه؟

و السؤال الاكبر..

ايمن نور هايموت قضاء و قدرا امتى؟؟؟؟؟

!!

هابي زلانطاين داي :)

على الرغم من اني في جوع شديد لوردة و كلمة حب هذه الايام..

الا انني لازلت لا اتقبل فكرة عيد الحب،

في السابق كان عدم تقبلي لها من مبدأ ديني بحت.. حتى لو ان هذا العيد او اليوم جُعل للتعبير عن مشاعرنا لمن نحب..

فلا داعي لأن تتحول الكرة الارضية كلها احمر فأحمر.. فقط للتعبير عن الحب..

و المبدأ الديني في الواقع لم يكن بسبب اصول الدين او ان هذا هو عيد القديس فلانطاين او اله مش عارفة مين عند الرومان

بل لأن هذا اليوم فيه اناس على ثلاث اشكال..

واحد و حبيبته طبعا مش متجوزين و مش مخطوبين و مش ناويين بس مأنتمين.. و هاتك يا حب و قد يكون قبل و قد يكون احضان و قد يكون ورقة عرفي مؤقتة.. و طبعا دا مش حب يتعمل له عيد.. دا عامل زي موسم التزاوج بتاع القطط..

الشكل التاني واحد و مراته.. يعني يوم تلاتاشر الست بتتحزم و تقول لجوزها بكرة النكد بكرة..و ذلك لأن الزوج مشغول عن انه يفتكر الحاجات دي، و طبعا مراته فاكرة و سامعة من صاحبتها مدام انشكاح ان جوزها جاب لها خاتم سوليتير بمناسبة زلانطاين اللي فات، و مدام انفتاح جوزها سفرها جزر المالديف و هي يا عين امها طالع عين امها في الشغل برة و جوة ولا جالهاش كيس جوافة ولا سافرت العين السخنة حتى،

بعض الزوجات يتذاكى و يقولك طب انا اجيب هدية و اخليه يتكسف على دم امه و يعرف ان المشاعر لا تقدر بالبتنجان،

و تروح مخنصرة من مصروف البيت و تجيب له هدية عليها القيمة، و في المقابل ما تلاقيش حاجة تبقى الطامة اكبر

الشكل التالت للناس يوم عيد الحب ينقسم لألف و باء

ألف: حب من طرف واحد و دا يؤدي الى حالة من الاكتئاب الشديد و حساسية ضد كل الدباديب و سماع اغنية حبيته سنين طوال و إليه القلب مال.. اتاريني كنت عاشقة قلب كان دايما مش عارفة ايه دي اغنية نوال الزغبي و ليها ذكريات عزييزة جدا عليا.. اصلي ياما سمعتها

المهم بلاش نخرج عن الموضوع انا كام مرة قلت بلاااش نرغي

باء: بنات زي القمر بس ما حصلش نصيب لا يكونو في الشكل الاول الحمد لله ولا التاني الحمد لله بردو

يعني ناس وحيدة، و انا خصيت بالذكر البنات عشان عادة الشباب مش فارقة معاهم و لو ميلوا على بنات كتير بيلاقوا في الايام المفترجة دي

و بردو البنات دي بتكون يا عيني حاسة بالانكسار خصوصا و هم ماشيين على كوبري قصر النيل وشايفين الدنيا حمرا و كل الاحبة اتنين اتنين و انا حبيبي مش عارفة فين..

عشان كدا انا شفت ان عيد الحب حرام في اشكاله التلاتة

عشان الحب مش لون احمر وورد و كلام حلو و بس

الحب مشاعر عميقة اوي اوي اوي

حاجة كدا شبه انفاسنا.. ما نعرفش بتطلع و تدخل ازاي..بس مش بنعيش غير بيها

والمشاعر بين الزوجين اسمى من كلمتين حب في معاد معين من السنة و نصبح تاني يوم نتخانق عشان زرار القميص مقطوع

ووردة بدون مناسبة مع كلمة رقيقة قد تكون مهرجان حب مش عيد بس

و في النهاية نحب نقولكو

هابي زلانطاين داي :)

لماذا هو مجرد شعور بالألم..

كثرت في الفترة الأخيرة تلك النوبات التي تصيبني بشعور مجرد من الألم..او مجرد شعور من الالم

هو بعض العذاب في اطراف روحي.... لا ادري له سببا على وجه التحديد

اعتقدت لفترة انها رغبة مني في لفت الانتباه.. لكن ذاك عذر واه لم يرضني.. ليس لاني لا استطيع الاعتراف ..فأنا وصلت لدرجة كبيرة من الوقاحة ان اقول لنفسي انتي ضعيفة وخاوية لتسترعي انتباه الاخرين بالدموع و هذا ليس هو الحال هذه المرة

الألم اعمق في روحي..

قد تكون هي تلك الهرمونات اللعينة تتلاعب بمزاجي.. ولكن الأمر طال و انا لست مريضة

قد تكون هي الرغبة المريرة في البحث عن السعادة.. ولكنني وصلت لقناعة داخلية ان السعادة ليست غاية انما هي وسيلة، للعيش

اذا لماذا هذا الالم

اعتقد ان السؤال لا يوجه لي هذه المرة بل يوجه الى هذا الالم الرابض في انفاسي

لا رغبة لي في التحدث الى اي احد.. و رغما عني يجب ان ابتسم في وجه من حولي ان اتحدث بطلاقة ولباقة

قد يكون الامرابسط من ذلك ليكون مجرد وعكة نفسية ولا يقتضي الامر اكثر من نوبتين او ثلاثة من بكاء ليكون كل شيءعلى ما يرام

درست شيئا من البرمجة اللغوية العصبية.. و اعتقد انه يمكنني برمجة نفسي على اني سعيدة

لكن الامر لا يجدي هذه المرة..

ولا البكاء مريح.. بل انه مرير

انا لا اعاني احلاما ضائعة .. او ما عدت ابحث عن احلام ضاعت حتى لا اكتشف انها ضاعت لاني لو وجدتها سأتألم لأنها لن تكون بروعة كونها احلاما..

صداع يعصف برأسي..

فقدت كثير من الذكريات.

لن ادعي ان لا احد يفهمني.. أنا لم احاول اللجوء لأحد

اعتقد ان الأمر يحتاج ركعتين بخشوع.. و بكاء بين يدي ربي.. و دعاء صادق..

يا رب

هبة و الممبار

من فترة و انا عايزة اكتب البوست دا و يمكن حماسي اول ما جت الفكرة في دماغي كان اكتر من كدا بكتير

فقلت يا بت يا نيرو..خلاص بقى ياما افكار و افكار كانت في دماغك و راحت لحالها يعني

اشكمن الأفكار دي زي الأكل كدا ما يتاكلش الا سخن و ملهلب...

بس رجعت قلت يا بت بس دا حدث تاريخي ابن ام تاريخي ما ينفعش يعدي كدا

فقلت و قررت و المشيئة لرب العالمين اني هاكتب البوست يعني هاكتبه

اه انا كلمتي ما تنزلش الأرض آآبداً

المهم بقى.. من اسبوعين كدا البت اختي اللي انا كنت كتبتلكو عنها من بوستين تلاتة اربعة فاتو اللي هي في كلية الطب دي

اللي في سنة خامسة طب عين شمس لا ترتدي نظارة و تقدس الحياة الطبية

المهم البت العسل دي جت في اجازة بقى و يا عيني البت طالع عين اللي خلفوها في ام مصر و مستشفيات مصر و مرضى مصر و حالتها كرب يا عيني

المهم رحت انا والواد العسول ابني ربنا يحميهولي يا رب و قضينا اول ويك اند عند مامي بعد طبعا ما اديت فروض الولاء والطاعة لزوجي العزيز عشان يتزحلق ويسيبني اروح عند ماما لوحدي الون يعني

المهم رحت بقى و قعدت عند مامي (معلش فرحانة اوي بموضوع مامي دا) قوم ايه شبطت انا والواد ابني في البت اختي انها تيجي عندنا تقعد عندنا الاسبوع

و طبعا ما ينفعش اخدها لوحدها عشان اختي التانية الاصغر منها هاتزعل و هي في مرحلة مراهقة و ما ينفعش نزعلها

قوم اخدت الاتنين بعد مناوشات و مهادنات مع مامي و روحنا البيت عشان نقضي اسبوع عندي بقى بدون تأمير مامي و نعمل اللي احنا عايزينه.. ننام نتفرج على تي في . نعمل كل اللي احنا عايزينه من غير ماما بقى و بس و هس و طبلة و شخليلة

المهم.. دا انا رغاية رغي والله انا صدعتلكو

في اول يوم ضاع عشان اضطريت اطلع انا و بعلي الكريم مشوار.. و يا عيني سبنا البنات في ام البيت

بس مش دا موضوعنا

اليوم التاني بقى

و يا عيني على اليوم التاني.. و حلاوة اليوم التاني

رجعت البيت بقى لقيت البت اختي الحلوة الحليوة عاملة لي مفأجاة.. الا و هي..

في بيتنا ممبار

انا خلال اربع سنين جواز لا اذكر اني عملت ممبار لبعلي الكريم

بسم الله ماشاء الله عليها.. رجعت البيت لقيت ممبار و المحمر و المشمر على السفرة

يا نهار ابيض احمر متوسط؟

بدل ما تقعد وتستجم.. قامت و قطعت البصل و الخضرة و غسلت الرز و عملت التسبيكة و و و و و و دا مش برنامج طبخ يعني

المهم بقى اينعم كان في حاجات كتير نغصت عليا اليوم الجميل دا واللي بعده

بس اقولكو سر..

انا باحب البت اختي دي اوي

مش عشان الممبار

ولا الفتة

ولا تشكيلة المحاشي اللي كانت اليوم اللي بعده

ابدا والله

ولا عشان هي في كلية الطب و جميلة و حلوة و تقدس الحياة الطبية..

لا بس انا بالاقي معاها حاجات كتير ضايعة و كلام كتير مختصر

الحبة اللي بتيجي تقعدهم عندي بيكونو عيد

واللي بنخرجهم سوا بيكونوا عسل

اينعم الواد ابني مجننها.. بس مش مشكلة

مهو انا بردو اختها ولازم تتحملني :)

انا كتبت البوست دا ليه؟

اكيد القضية اكبر من الممبار

دي قضية هبة و الممبار

اكيد هارجع ارغي معاكو تاني

خلص الكلام

مر وقت طويل منذ اخر بوست لي، لم استطع خلال ذلك الوقت الكتابة..

لا ادري هل كان شعوراً بالعجز أو القهر.. او هو تشاؤم لإيماني انه لم يعد شيء يفيد

لا تزال صور ضحايا غزة لا تفارق نومي .. لتعلمني ان الأمر لا ينته بمجرد وقف اطلاق النار من جهة واحدة على حد قول اسرائيل

و طبعا مصر بطلة لأنها لعبت دورا كبيرا في إقناع اسرائيل بوقف النار

و جاء أوباما الحلم الذي ظل الكثيرون يحلمون به.. حلماً للتغير، و كأنه هو الفارس المغوار الذي سيرد لنا حقوقنا..

لا أتفاءل به كثيرا..و لم يتخذ إلى الان أي موقف يقول انه سيلملم الجراح

القمم العربية.. كالعادة لم تأت بإجماع على شيء مهم

ولا ادري ما دخل ايران بالموضوع

اشياء كثيرة لا افهمها..

وتوقف الكلام نسبيا عن الحرب

الشهداء استراحو، ولا اعلم كيف يكمل من نجا حياته

لا أدري لماذا اكتب هذا البوست من الأساس..

انا لم اكتب تهنئة بالعام الجديد.. ففي الواقع كانت ستبدو وقاحة مني ان اهنأ بقدوم عام لم يحمل لنا سوى الموت و بأبشع الصور

و لم اكتب تهنئة لنفسي و زوجي هذه بمناسبة عيد زواجنا الرابع

و لم اكتب عن فرحتي بقدوم اختي من مصر في اجازة لها من الكلية

ولا يعد هذا البوست تهنئة بأي حال من الأحوال

ربما هو فقط كسر حالة الجمود التي تنتابني

خلص الكلام