بعيداً عن الأجواء النفسية الملبدة ليا
و بعيداً عن الاجواء السياسية المنيلة بستين نيلة في سنتنا
و بعيداً عن فقعة المرارة على خروج هاني سرور و من والاه من القضية
و بعيداً عن الإضرابات و المحليات و اللذي منه
لأن الصراحة الكلام لا بقى يودي ولا يجيب ولا في امل إلا في ربنا يبدلنا بقوم خير مننا و خلاص
او ياخد اللي بالي بالكو
انهاردة قررت احدث حملة تغيير شخصية
صحيت الصبح، كالعادة بضرب الجزم
بصيت لوشي في المراية
جيت على نفسي و صبحت عليا و سألتني عن أخباري و صحتي و نفسيتي
و بعدين اتحاورت انا و نفسي في ضرورة احداث تغيير في المجتمع الدولي عشان الأوضاع بقت تتفاقم اوي
فتحت الراديو كعادتي الصباحية
عملت كوباية كابشتينو يا سونا اللي هو شاي بس انا بادلعه
و حضرت اللبس عشان اخرج للمعركة الحياتية اليومية
يوم عادي خالص اهو
بس بينما انا باعمل دا كله ، كان راسي شغال زي المكوك الفضائي في احداث تغيير في الحياة
اصل الحياة هي الحياة كل يوم، برضايا او غصبن عني هي هي
و قعدت افكر اغير الكون ازاي اغير الكون ازاي
لدرجة اني من كتر التفكير كنت هاشد في شعري عشان مافيش حاجة تغير الكون غير ان اللي قاعد على قلوبنا بقاله قرون دا يحل عن نفسنا
و دي حاجة في ايد ربنا وحده
قعدت افكر افكر افكر
و فجأتن، دماغي نورت زي اللمبة الالاووز
إشارة لوجود فكرة منيرة بنت منيرة
بصيت لنفسي في المراية على السريع
اديت شعري بوسة
لميتة و حطيت الطرحة
و جرررررررري على الحل
رحت للكوافيرة اللي جنب بيتنا و هي لسة بيفتحو
قالت لي : شعر ولا دقن يا نيرو
قولتلها: شعر
ضحكت و جابت المقص و قالت لي هاتساوي اطرافه كالعادة ولا عايزة تعملي ايه
قولتلها : لا هاشيله من جذوره و حتى الأطراف
بحلقت لي، قالت لي ايه
قولتلها اقولهالك بشياكة شوية: عايزة اقصة الا جارسون
قالت لي حرام ، قال يعني كان عندي شعر اصلا
و من هنا لهنا، خليتها توافق اخيرا انها تحررني
و قصيت شعري، يكاد يكون زلاباطة
شعور جميل اوي انك تعيش زلاباطة
فروة راسك تشم الهوا شوية
قفاك يشوف النور
مافيش كلاكيع تحت الطرحة
الدش يخلص في ثواني
الشامبو و البلسم يقعد كتير
و هنا واحد من الجامهور يسألني
و ايه علاقة شعر سعادتك المأسوف على جفافه بحل المشكلات الراهنة
اقوله يا مواطن، دا نوع من السيمبوليزم،اللي هو رمزية
انا لما اقص شعري زلاباطة ، و دا في الواقع مالوش اي علاقة بالواقع، فأنا بأرمز للحلول العبقرية اللي بتتحفنا بيها حكومتنا الحبيبة
اللي مالهاش اي علاقة بالواقع
غير ان قفانا يشوف النور اكتر
عشان.. انتو عارفين بقى
المهم، الحياة حلوة، و هي زلاباطة
Posts
