من فترة و انا عايزة اكتب البوست دا و يمكن حماسي اول ما جت الفكرة في دماغي كان اكتر من كدا بكتير
فقلت يا بت يا نيرو..خلاص بقى ياما افكار و افكار كانت في دماغك و راحت لحالها يعني
اشكمن الأفكار دي زي الأكل كدا ما يتاكلش الا سخن و ملهلب...
بس رجعت قلت يا بت بس دا حدث تاريخي ابن ام تاريخي ما ينفعش يعدي كدا
فقلت و قررت و المشيئة لرب العالمين اني هاكتب البوست يعني هاكتبه
اه انا كلمتي ما تنزلش الأرض آآبداً
المهم بقى.. من اسبوعين كدا البت اختي اللي انا كنت كتبتلكو عنها من بوستين تلاتة اربعة فاتو اللي هي في كلية الطب دي
اللي في سنة خامسة طب عين شمس لا ترتدي نظارة و تقدس الحياة الطبية
المهم البت العسل دي جت في اجازة بقى و يا عيني البت طالع عين اللي خلفوها في ام مصر و مستشفيات مصر و مرضى مصر و حالتها كرب يا عيني
المهم رحت انا والواد العسول ابني ربنا يحميهولي يا رب و قضينا اول ويك اند عند مامي بعد طبعا ما اديت فروض الولاء والطاعة لزوجي العزيز عشان يتزحلق ويسيبني اروح عند ماما لوحدي الون يعني
المهم رحت بقى و قعدت عند مامي (معلش فرحانة اوي بموضوع مامي دا) قوم ايه شبطت انا والواد ابني في البت اختي انها تيجي عندنا تقعد عندنا الاسبوع
و طبعا ما ينفعش اخدها لوحدها عشان اختي التانية الاصغر منها هاتزعل و هي في مرحلة مراهقة و ما ينفعش نزعلها
قوم اخدت الاتنين بعد مناوشات و مهادنات مع مامي و روحنا البيت عشان نقضي اسبوع عندي بقى بدون تأمير مامي و نعمل اللي احنا عايزينه.. ننام نتفرج على تي في . نعمل كل اللي احنا عايزينه من غير ماما بقى و بس و هس و طبلة و شخليلة
المهم.. دا انا رغاية رغي والله انا صدعتلكو
في اول يوم ضاع عشان اضطريت اطلع انا و بعلي الكريم مشوار.. و يا عيني سبنا البنات في ام البيت
بس مش دا موضوعنا
اليوم التاني بقى
و يا عيني على اليوم التاني.. و حلاوة اليوم التاني
رجعت البيت بقى لقيت البت اختي الحلوة الحليوة عاملة لي مفأجاة.. الا و هي..
في بيتنا ممبار
انا خلال اربع سنين جواز لا اذكر اني عملت ممبار لبعلي الكريم
بسم الله ماشاء الله عليها.. رجعت البيت لقيت ممبار و المحمر و المشمر على السفرة
يا نهار ابيض احمر متوسط؟
بدل ما تقعد وتستجم.. قامت و قطعت البصل و الخضرة و غسلت الرز و عملت التسبيكة و و و و و و دا مش برنامج طبخ يعني
المهم بقى اينعم كان في حاجات كتير نغصت عليا اليوم الجميل دا واللي بعده
بس اقولكو سر..
انا باحب البت اختي دي اوي
مش عشان الممبار
ولا الفتة
ولا تشكيلة المحاشي اللي كانت اليوم اللي بعده
ابدا والله
ولا عشان هي في كلية الطب و جميلة و حلوة و تقدس الحياة الطبية..
لا بس انا بالاقي معاها حاجات كتير ضايعة و كلام كتير مختصر
الحبة اللي بتيجي تقعدهم عندي بيكونو عيد
واللي بنخرجهم سوا بيكونوا عسل
اينعم الواد ابني مجننها.. بس مش مشكلة
مهو انا بردو اختها ولازم تتحملني :)
انا كتبت البوست دا ليه؟
اكيد القضية اكبر من الممبار
دي قضية هبة و الممبار
اكيد هارجع ارغي معاكو تاني
Posts
4 comments:
يادي الفضيحة ام جلاجل يادي الجرس ام حناجل
ده انتي مش بيتبل في بقك فولة
انا هاشمعلك البلوج ده بالشمع الاحمر
وهاقول ل مامي (انتي اتعلمتي مامي دي فين )انك بتتكلمي في السياسة شوفي بقى
بس هو انتي فعلا كتبتي البوست ده ليه ؟
المهم بقى انا اكتشفت انك رغاية فعلا :p
بس هو ده كله من تاثير الشيكولاته
بحبك انا كمان جد والله
هبــــة
ههههههههههه
اتنيلي بادور لك على عريس يا هطلة
يعني واحدة بتكتب اختها عملت ممبار و محمر و مشمر و محاشي ولا ترتدي نظارة و تقدس الحياة الطبية ليه
مش بدل ما احكي هنا في البلوج على المريضة الكبيرة في السن اللي راحت الطوارئ و كانت عايزة ترسم عليكي لابنها الوسيم و انتي روحتيها هي و ابنها البيت بدل ما تعمليلها تشيك اب
علام ايه بلا نيلة
على رأي ابلة فيفي بتاعة الفيزيا
البت ما لهاش غير بيتها و الممبار
فهمتي بقى كتبت البوست ليه
بليز اي حد يقرا الكومنت دا ما يشوفوش
نيران
الحكايه مش حكايه ممبار .. دى حكايه الناس الى ورا الممبار
انتى هاتسيحى انتى واختك؟ ايه ياربى الفضايح دى ؟
منتظرينك فى البلكونه تشربى شاى
ميجوووووووووو
نيران حرام عليكي يعني اختك فيها المواصفات الكتير دية والمنبار هو بس اللي هيجبلها العريس ومن غير منبار مادام هي اختك فاكيد الف من يتمنوها
هبة انا طبعا لا اعرفك لكن ارسل مليون سلام وتحية على الناس المنورة دية وخلي بالك من المرضى اعملي معروف يا ملاك الرحمة
Post a Comment