جبنة بطماطم

يوم اجازة و جوزي قرر انه يطلع هو و صاحبه

مع الف سلامة مهو الواحدة مننا بردو محتاجة نفس .. بريك

و لأول مرة مش هاقلق من الكابوس اليومي بتاع هانتغدى ايه انهاردة

و انا زهقت من اكل برة، و مش عايزين اكل دسم عايزين خفيف و مرة نفسي في محشي و مرة ايه رأيك تعملي لنا صينية مكرونة بالباشميل كدا على السريع

قال ايه المكرونة بالباشميل بقت على السريع

الله يسعد ايامك يا امي كنا بنغسل وراها مواعين المطبخ كلها يوم المكرونة بالبشاميل دا

المهمممممم بعيدا عن كل الصداع دا

انا حرة، و لو ليوم واحد

اكل اللي نفسي فيه

و بما اننا جينا عند نفسي، فأنا لا اعشق في حياتي حاجة زي

الجبنة بالطماطم

يم يم يم

في الصيف ترطب وفي الشتا تدفي

حاجة لا يمكن حد يقول ما بيحبهاش و لو حد قال كدا يبقى ما بيفهمش

المقادير:

حتة جبنة بيضا اي نوع تحبه و تحديدحجمها انت و طفاستك.. اقصد انت و جوعك

و شوية طماطم و انا شخصيا بافضل الطماطم تكون كتير

و بلاش عبط و تروحو تجيبوا طماطم خضرا زي بتاعة السلطة

والجبنة التلاجة ما تنفعش مع الطبق دا

لالالا مش هاتنفع

طماطم حمرا مستوية و كلها عصارة

سلطانية غويطة

شوكة، و لو انت بس اللي هاتاكل مش محتاج

رغيفين

حط الجبنة في السلطانية، واهرسها شوية بالشوكة

وابتدي قطع عليها الطماطم، مش مهم على قطاعة الخضار، و مش مهم كبيرة ولا صغيرة، و مش مهم تكون قطع متساوية

المهم في الطبق دا .. الشغف،

ممكن ناس تضيف زيت وناس تضيف شطة وناس تضيف خيار او فلفل..

لالالا

بالنسبة لي الطبق هو الجبنة بالطماطم بس..و تناغم الجبنة بالطماطم

خلصت تقطيع الطماطم

قلبها بطراطيف صوابعك مع الجبنة، يا ريت بتلات صوابع بس عشان تعرف تلحسها بعد ما تخلص

ادعك الطماطم مع الجبنة شوية لحد ما قوام الجبنة يخف و ما يبقاش في كتل، تبقى زي الكريمة كدا تدوب في البق

ممكن تاكل حتة طماطم مع شوية جبنة عشان تدوقهم

يا سلام، تسلم ايديك، ولا اروع برامج الطبخ

اشطف ايدك، هات صينية، حط العيش والسلطانية و صب لنفسك كوباية شاي سكر زيادة

في ناس ممكن تحب الشاي بحليب، بس انا باحب الشاي.. كشاي بس

روح اقعد قدام التلفزيون، هات برنامج بتحبه

اضحك حتى لو مافيش داعي، اومال هاتضحك امتى اذا ماكنتش هاتضحك و انت بتاكل جبنة بطماطم

اشرب شوية شاي

خلي بالك قبل ما الطبق يخلص، خلي اخر لقمة من العيش صغيرة بالنسبة لحتة الجبنة المتبقية في الطبق

عشان تبقى اخر لقمة فيها جبنة كتير

عشان حلاوة الطبق ان اخر طعم في بقك يكون الجبنة بالطماطم

بعد ما تخلص هايتبقى شوية جبنة سايلين في الطبق

بصوباعك و الحسهم

الطبق دا ما ينفعش يتبقى منه حاجة

خالص

كمل كوباية الشاي

كمل برنامج التلفزيون

و بالهنا والشفا

نصيحة اخوية عشان ماحدش يدعي عليا

لو خاطب او خاطبة اوعوا تاكلو جبنة بطماطم قدام الشريك المستقبلي ليطفش

الطبق دا مصمم بطريقة انا وانت ولا حد تالتنا

لو بتحب شريك حياتك اوي. سيبه يوم في الاسبوع بحريته عشان ياكل جبنة بطماطم

الطبق دا بيبقى مايع لو اتعمل سندوتش

بالهنا والشفا