هابي زلانطاين داي :)

على الرغم من اني في جوع شديد لوردة و كلمة حب هذه الايام..

الا انني لازلت لا اتقبل فكرة عيد الحب،

في السابق كان عدم تقبلي لها من مبدأ ديني بحت.. حتى لو ان هذا العيد او اليوم جُعل للتعبير عن مشاعرنا لمن نحب..

فلا داعي لأن تتحول الكرة الارضية كلها احمر فأحمر.. فقط للتعبير عن الحب..

و المبدأ الديني في الواقع لم يكن بسبب اصول الدين او ان هذا هو عيد القديس فلانطاين او اله مش عارفة مين عند الرومان

بل لأن هذا اليوم فيه اناس على ثلاث اشكال..

واحد و حبيبته طبعا مش متجوزين و مش مخطوبين و مش ناويين بس مأنتمين.. و هاتك يا حب و قد يكون قبل و قد يكون احضان و قد يكون ورقة عرفي مؤقتة.. و طبعا دا مش حب يتعمل له عيد.. دا عامل زي موسم التزاوج بتاع القطط..

الشكل التاني واحد و مراته.. يعني يوم تلاتاشر الست بتتحزم و تقول لجوزها بكرة النكد بكرة..و ذلك لأن الزوج مشغول عن انه يفتكر الحاجات دي، و طبعا مراته فاكرة و سامعة من صاحبتها مدام انشكاح ان جوزها جاب لها خاتم سوليتير بمناسبة زلانطاين اللي فات، و مدام انفتاح جوزها سفرها جزر المالديف و هي يا عين امها طالع عين امها في الشغل برة و جوة ولا جالهاش كيس جوافة ولا سافرت العين السخنة حتى،

بعض الزوجات يتذاكى و يقولك طب انا اجيب هدية و اخليه يتكسف على دم امه و يعرف ان المشاعر لا تقدر بالبتنجان،

و تروح مخنصرة من مصروف البيت و تجيب له هدية عليها القيمة، و في المقابل ما تلاقيش حاجة تبقى الطامة اكبر

الشكل التالت للناس يوم عيد الحب ينقسم لألف و باء

ألف: حب من طرف واحد و دا يؤدي الى حالة من الاكتئاب الشديد و حساسية ضد كل الدباديب و سماع اغنية حبيته سنين طوال و إليه القلب مال.. اتاريني كنت عاشقة قلب كان دايما مش عارفة ايه دي اغنية نوال الزغبي و ليها ذكريات عزييزة جدا عليا.. اصلي ياما سمعتها

المهم بلاش نخرج عن الموضوع انا كام مرة قلت بلاااش نرغي

باء: بنات زي القمر بس ما حصلش نصيب لا يكونو في الشكل الاول الحمد لله ولا التاني الحمد لله بردو

يعني ناس وحيدة، و انا خصيت بالذكر البنات عشان عادة الشباب مش فارقة معاهم و لو ميلوا على بنات كتير بيلاقوا في الايام المفترجة دي

و بردو البنات دي بتكون يا عيني حاسة بالانكسار خصوصا و هم ماشيين على كوبري قصر النيل وشايفين الدنيا حمرا و كل الاحبة اتنين اتنين و انا حبيبي مش عارفة فين..

عشان كدا انا شفت ان عيد الحب حرام في اشكاله التلاتة

عشان الحب مش لون احمر وورد و كلام حلو و بس

الحب مشاعر عميقة اوي اوي اوي

حاجة كدا شبه انفاسنا.. ما نعرفش بتطلع و تدخل ازاي..بس مش بنعيش غير بيها

والمشاعر بين الزوجين اسمى من كلمتين حب في معاد معين من السنة و نصبح تاني يوم نتخانق عشان زرار القميص مقطوع

ووردة بدون مناسبة مع كلمة رقيقة قد تكون مهرجان حب مش عيد بس

و في النهاية نحب نقولكو

هابي زلانطاين داي :)