دوخيني يا لمونة

صباح غريب انهاردة

سبق و أن ذكرت اني فاشلة جدا في موضوع السياسة

ليس لأني غبية و العياذ بالله

بس ببساطة لأني مش فاهمة مين بيكدب على مين و مين كداب اكتر من التاني

و دا طبعا هو لب السياسة

انك ما تقولش الحقيقة كاملة، أو انك تقول الحقيقة من وجهة نظرك التي بلا شك تختلف عن وجهة نظر الآخرين، و التي ينتج عنها وجهة نظر تانية خااالص غير وجهة النظر الأولانية اللي كنت يا عيني هاتكونها و بالتالي فلا داعي لتكوين وجهة نظر أصلا..

تقعد قدام برنامج تلفزيوني من اياهم، تلاقي مذيع جايب ضيف و محموق عليه و بيفهمه انه بيتلاعب بمستقبل الأمة العربية و حاضرها و ماضيها

طب اصلا مهو المشكلة في التاريخ

و اللي بيكتبوه

المشكلة ان جميع الساسة بلا استثناء حقهم يا روح امهم مهضوم ..

يعني مافيش مرة ايمي اوورد تمنح ليهم

ولا اوسكار

ولا حتى جايزة الهرم الخشبي من مهرجان القاهرة السينيمائي

مع انهم والله بارعين..

يعني انا في احيان كتيرة اوي باكون على وشك اني اصدق، و ابتدي اكره جهة ما على حساب جهة أخرى

لكن .. انا طبعا باحاول اني استخدم جهاز كشف الكدب و الحاسة السابعة و الأفلام دي.. بس النتيجة واحدة

علامة استفهام كبيرة اوي بتنور زي لمبة نيون على دماغي..

و المشكلة ان الجماعة السياسييين دول بيصدقوا نفسهم..

يعني تلاقي الواحد قاعد يشيل و يحط في نفسه و يقدم نفسه فداء للقضية

المشكلة هي بقى

هي ايه القضية؟؟

و لمين

و لصالح مين

و على مين؟

يعني زمان كانوا بيفهمونا في المدارس.. ان قضيتنا العروبة و الاتحاد

و ان الشعوب العربية على قلب رجل واحد.. بس في اختلاف في الحكومات

و ان الاتسعمار قطعنا حتت حتت

انا سؤالي الأكبر.. فين الراجل الواحد اللي احنا قاعدين على قلبه..

اكيد مات..فطس.. او ان الاستعمار الغاشم قطعه هو شخصيا حتت حتت

و يكبر السؤال اكبر و اكبر

هو مين الاستعمار.. و يعني ايه استعمار

مش الاستعمار يعني ناس غريبة تيجي تنهب أرضنا، و تاخد خيرنا و تديه لغيرنا

و احنا دلوقت مش مستعمرين، طب فين خيرنا، و ليه لسة بياخده غيرنا

طب و المستعمرين، هل هم بجد عايزين يتحرروا

و يتحرروا من مين و يحكمهم مين؟

مهم لما يتحرروا من الناس الغريبة اللي بتاخد خيرهم تديه لغيرهم

هاتيجي ناس قريبة بردو تاخد خيرهم تديه لغيرهم

بيقولوا بردو في كتب التاريخ ان الثورة جت عشان تمحي الفروق الطبقية،،

و ما يبقاش في المجتمع هانم و باشا و بيه

بالنسبة للفروق الطبقية، فعلاً اتمحت

ماعدش فيه طبقات عايشة

غير طبقة بس

و الباقي كله تحت خط الحياة

أما البشوات و البهوات، فلسة موجودين، بس ماعادوش من الطبقة الراقية ولاد الناس

بقوا من الطبقة الواطية ولاد الحكومة..اللي لابسين بدل رسمي عليها نسور و صقور

في نشرات الأخبار، تلاقي الرئيس الفلاني قابل الرئيس العلاني عشان يتباحثوا الأمن في المنطقة، و العلاقات بين البلدين و سبل تطويرها

و بعد اسبوع يتقابل نفس الرئيس الفلاني مع الرئيس العلاني عشان بردو يتباحثوا الأمن في المنطقة و العلاقات بين البلدين و سبل تطويرها

و بعد شهر يجي بقى الرئيس العلاني عشان هو يتقابل مع الرئيس الفلاني عشان يتباحثو أمن المنطقة و العلاقات بين البلدين و سبل تطويرها

طب هم ما بيتعبوش؟

طب هو احنا مشكلاتنا تتحل ازاي

بيقولوا ان اول خطوة لحل المشكلة هو اننا نعرف ان في مشكلة، و نحدد أبعادها

طب ادينا بنتعرف اننا في مشكلة

و ابعادها .. بعيدة اوي اوي اوي اوي بعيد عنكو

ابعادها اننا مش فاهمين

و ماعندناش وجهة نظر

و اوقات كتير ما عندناش نظر أصلاً

بس خلاص

انا اكتشفت

مشكلتنا الحقيقية هي

اني جعانة و عشان كدا بافكر

لازم محدش يفكر

غير هاناكل ايه انهاردة