بعد البداية..

امبارح حاولت اكتب بوست جديد..

بس للأسف كان عندي شغل كتير اوي



و الشغل دا هو اللي انا عملت عشانه المدونة دي..

عشان أهرب من الشغل، و اجي هنا..



الطريف في الأمر اني كل شوية ادخل البلوجر عشان اشوف التعليقات



بس اكتشفت ان ماحدش يعرف هنا عشان يعلق، و بالتالي.. اتأكدت طبعا اني عبيطة



على كل حال..



شعوري اني دخلت عالم التدوين دا شعور جميل



بافكر في ايه للمدونة دي،



مش عارفة، يعني انا مش ناوية لها على حاجة بالضبط



انا مش بافهم في السياسة كتير.. بس اكيد انا بني ادمة و باتضايق لما حاجات كتير تستفزنا



و مش خبيرة في الادب.. بس انا انسانة و ليها مشاعر، كما اتفقنا سابقاً



و أحيانا كثير باحس اني ضحلة الثقافة، و لو اني باجاوب على كتير من أسئلة من سيربح المليون صح



بس يمكن دا حسن حظ



طب انا باكتب ليه بقىىى



باكتب عشان نفسي



عشان الناس اللي يشبهوني



عشان الانسانة اللي انا عايزاها تعيش جوايا قبل ما تاخدها زحمة الحياة



يبقى اتفقنا اني هاكتب اللي يجي على بالي..





و اللي على بالي دلوقت اني اشرب فنجان قهوة سكر زيادة،



و اسمع فيروز



مش اغنية رومانسية ولا حاجة



انا من امبارح بادندن في "السيارة مش عم تمشي

بدنا حدا يدفشها دفشي"



حلوة دفشة دي..



اسيبكم بقى عشان عندي شغل..



بس كيفما اتفق.. كل لما الاقي فرصة اكتب .. هاكتب





صباحك ورد :)