نحو ضوء القمر

لملمت دموعها عن طاولة الانتظار
و انصرفت

تركت خلفها كل الذكريات

لم يعد يفيدها أن تبكي

ليست المرة الأولى التي تنتظره فيها

هو

السراب

بكت لأجله ليالٍ طوال

حملت بداخلها أحلامها

لتبحث عنه

أبداً ما رأته

أبداً ما عرفت ملامحه

كان يزورها طيفاً

كل ليلة

يطبع قبلة على جبين حزنها

يبعثر بداخلها الألم

و يرحل

يمتطي ضي القمر

ولا يعود

إلا على بريق دموعها

جمعت دمعاتها
مر بضع و ثلاثون ربيعاً من بكاء
حتى ضاعت ملامح الربيع
جاء الخريف يزف الشيب إلى خصلات شعرها
و هي
لازالت تنظره
هو
الرجل الحلم
في زمن ما عادت فيه الأحلام تتحقق
كم حدثته عن الغد
و الغد

لم يعد يأتي

فارتدت عباءة الصمت

و اغتسلت بدموعها

كان البرد فقط من يفتح لها ذراعيه

ارتعشت

هربت من كل العيون

ارتدت ثوباً أبيضاً

قررت
أن تذهب هي إليه
تعرف طريقه
ضوء القمر
فتحت نافذتها
فردت ذراعيها
و انطلقت
نحو ضوء القمر

و حينما جاء الصباح

تجمع الناس حول الجسد الأبيض المسجي

يتهامسون

تراها.. لماذا انتحرت!!!!!

بدأت

السلام عليكم

مر مش عارفة قد إيه على البلوج فات

ما اقدرش اقول اني حسيت براحة نفسية اول ما خلصت كتابته

او بعد ما قرأته مرات و مرات

بس..

الحمد لله ابتديت احط نفسي على بداية الطريق

يارب استمر..

محتاجة دعواتكم

و هاكتب لكم بالتفصيل ايه برنامج الإصلاح الذاتي و إعادة التأهيل اللي ابتديت اشتغل فيها

1. ورقة و قلم و مخطط لكل حاجة عايزة اعملها (و دا للتغلب على موضوع عدم التركيز و التشتت الفكري)
   


2. تسجيل اهدافي كل يوم من اجل تعزيزها في العقل الباطن (موضوع برمجة لغوية عصبية هاشرحه لاحقا)
   


3. تخصيص عشر دقايق قبل النوم للاعتراف بأخطاء اليوم لتفاديها.(حتى لو و انا باغسل سناني قبل ما انام)
   


4. تخصيص ورد يومي لقراءة القرآن الكريم في كل الظروف و الأحوال و حتى لو باموت( يا رب يعيني على نفسي)
   


5. عمل جدول لمحاسبة نفسي على السنن و ليس فقط الفرائض)
   


6. تخصيص وقت نوعي لقضائه مع الواد العسل ابن العسل ابني.
   


7. الاشتراك في نادي رياضي عشان العب رياضة و اكون نشيطة.
   


8. تخصيص وقت نوعي لقضائه مع الحج جوزي.. و انشالله لعب دور كوشتينه معاه.
   


9. تخصيص عشر دقائق قراءة يوميا.. و لنقل حاليا في كتاب قوة عقلك الباطن (بما اني ناوية على استغلال الطاقات الكامنة كلها)
   


10. السعي بكل السبل لبر الوالدين و صلة الرحم و تنمية العلاقات الاجتماعية (حتى لو عن طريق ماسيج للكل)
    


11. بس كفاية كدا
    


12. اللي عنده اقتراحات تاني الله يكرمكم.. ما يبخلش بيها عليا...
    

تحياتي و سوف نوافيكم بالتطورات لاحقا..

لطفا.. لا تقرأ الأسطر القادمة

يمكن لأول مرة اكون محتاجة اتكلم مع حد وما القاش..

و دا شعور مش لطيف إطلاقا

بس حتى لو لقيت حد اتكلم معاه.. مش هاكون صريحة

مش عشان انا باكذب.. و لكن عشان زي كل الناس باتجمل

لازم احافظ على مظهري و صورتي قدام الناس

لازم يشوفوني المحترمة العاقلة اللي مافيش مني اتنين

اللي بتسمع للي حواليها و بتشيل هم الناس و بترضي كل الناس

على حساب مين مش مهم

المهم اني عيب اكشر عشان ماحدش يتضايق

و لازم ابتسم عشان ابث الفرح في نفوس اللي حولي

زهقت

انا عايزة اعيط

انا مش جدعة، ومش باتحمل مسؤولية حد، و مش قد اللعبة اللي انا فيها دي كلها

انا عايزة ارمي همي على حد.. مايكونش عارفني عشان ما يقولش.. معقووووول

دا انا كنت فاكرك كذا و كذا

عشان انا مش كذا و كذا

والله انا اضعف مما اي حد يتخيل

و اسوأ مما أي حد يتخيل

دا انا جوايا عيوب لو فكرت فيها اموت

فما بالكم ان حد يعرفها عني

انا مش الصورة اللي الناس راسمها.. لانا عاقلة ولا شاطرة ولا نيلة

يمكن اكون انانية كتير اوي

و يمكن اكون اديت لنفسي حجم اكبر من حجمي

و يمكن اكون كذبت على كل الناس

بس

خلاص انا مش قادرة اكذب على نفسي

انا مش بقوة الايمان اني استحمل دا كله

اللي هو ايه مش عارفة

عشان كدا اسمحوا لي البوست دا عشان احط مراية قدام نفسي و اقول كل اللي نفسي فيه

من غير ما حد يحاسبني

ولا اشوف نظرة استغراب من حد

نيران

انتي انسانة ضعيفة ما عندكيش إرادة حقيقية تنفذي اي شيء انتي بتقرريه

بتتحمسي للأفكار اوي.. و ساعة التنفيذ زي عود الكبريت

مش انتي بتنتقدي الناس اللي بيعملوا كد

اسمعيها مني.. انتي ضعيفة الإرادة و مش بتتحملي المسؤولية

و مش بتعملي الحاجة اللي بتتطلب منك الا على اخر لحظة

دا انتي يا مؤمنة صلاتك بتصليها على اخر لحظة

و مش عايزة اقولك مش بتركزي فيها

اصحي، فوقي

انتي مش وصية على حد ولا احسن من حد

اللي بتنتقديهم دول احسن منك

على الأقل مش بيكذبوا على نفسهم

عايزة تعيشي حياة مش حياتك و ترسمي لنفسك دور مش دورك

انتي يمكن ما تكونيش حتى بالرومانسية اللي انتي بتحكيها دي على نفسك

قد يكون اللي انتي بتكتبيه على مدونتك دا مجرد ترهات كلام

انتي حتى مش مبدعة زي ما بتقنعي نفسك

انتي لازم تقفي مع نفسك وقفة صح

عشان تقدري تبدأي اي حاجة

عايزة تدرسي تاني..

ادرسي.. بس بطلي تتكلمي عن اهمية الدراسة قدام الناس و انك ناوية تدرسي

لما تعملي حاجة ابقى تشدقي بيها قدام الناس

انتي مجرد واحدة من آلاف.. بس ربنا انعم عليها بطلاقة في اللسان شوية

انتي حتى مش حنينة كفاية على ابنك

و مش مخلصة كفاية لزوجك

و ايه يعني هو مش بيجاملك و يقولك كلام حلو

انتي عارفة انه كويس

و احسن من غيره كتير اوي

و انتي اللي اخترتيه ما حدش اجبرك

شيلي الأفكار الزبالة دي من دماغك و عيشي

مش كل لحظة و التانية تتخيلي الحياة بدونه هاتكون احسن قد ايه

عشان انتي من جواكي عارفة انها مش هاتكون احسن.. ولا انتي ما يملاش عينك غير التراب

حرية ايه اللي انتي عايزاها..

بطلي انانية بقى

فوقي

افتخري انك ام

بطلي تتمسكي بأيام فاتت.. ايام الحرية المزعومة

و هم فين اللي كانوا معاكي ايام الحرية

و فينهم من احلامك

رتبي اولوياتك صح بقى

اعرفي انتي عايزة تكوني فين بالضبط في الحياة

و كوني صادقة مع نفسك قبل ما تكوني صادقة مع الناس

انا معاكي انك لازم تحافظي على الصورة اللي رسمتيها لنفسك قدام الناس..

بس مافيش مانع مرة تقولي لأ.. انا مش هاقدر اعمل دا

مافيش مانع مرة تقولي للي يزعلك انا زعلانة

انتي مش مثالية يا بنتي

انتي بشر.. و انتي اكتر واحدة عارفة ان امكانياتك مش خارقة

حطي احلامك على قد امكانياتك

و بطلي تكذبي

و بطلي تعيشي دور انا شايلة هم الناس كلها و ماحدش شايل همي

عشان دا مش صح اوي

هي بس مشغوليات الحياة

انتي مش محتاجة دكتور نفساني ولا حاجة

ولا محتاج الأمر انك تأزمي نفسك

عشان انتي اغلاطك كتير اوي

نيران فوقي بقى

خليكي عندك ثقة في نفسك

انتي مش لازم تعجبي كل الناس

اللي يعجبه يعجبه على حالك

ما تحاوليش ترضي حد على حساب نفسك

بلاش تعملي حاجات تخليكي ما تعرفيش تنامي اليل

نفذي كل النصايح اللي بتنصحي بيها غيرك

نظمي وقتك بدل ما انتي مهرجلة كدا

و الكل فاكرك يا ماهنا ياما هناك

بطلي تتكلمي على الناس. بداعي انك مرحة و بتاعة دعابة

اتنيلي بصي لعيوبك انتي الأول

عيطي لو عايزة.. قولي للدنيا كلها اللي انتي عايزاه

بس كالعادة

في سرك!!

كل عام و انتم بخير

الخامس عشر من رمضان

انا مش على المستوى المطلوب في رمضان

الوقت بيتسرق بشكل غريب

انا كنت مخططة لأكثر من كدا

انا مش مميزة الشهر دا

الشياطين متسلسلة..

معقول دا كله من النفس الأمارة بالسوء

ولا هي الغفلة

في مقولة مهمة اوي..في الدنيا انظر لمن هم اقل منك.. فتقنع

أما في الدين فانظر لمن هم أعلى منك فتطمع

مش عارفة مين اللي قالها

يمكن انا اصلا..

بس بجد في ناس احسن مني بكتير

باقي خمستاشر يوم، لسة الوقت مافاتش

لسة الشمس ما طلعتش من الغرب

لسة فيا نفس و روح

لسة في أمل في رحمة و مغفرة رب العالمين

مش هاضيع الشهر دا

مش هاضيع الفرص الكتير اوي دي

يا رب

رمضان بقى

عندي حاجات كتير اقولها في رمضان

اولا لازم اقول كل سنة و انتو و انا و هم طيبين

بس في حاجة محشورة في زوري

هاموت لو ما قولتهاش..

علما اني صايمة والله

رمضان ما بقاش زي زمان

او احساس الناس برمضان مش زي زمان



حتى انتظارنا لرمضان مش زي الأول

يعني السنة دي مثلا .. كلنا بنتعامل و عارفين ان رمضان يوم الاتنين

اختي الصغيرة قالت لي يمكن الأحد او الاثنين

بصيت لها باستغراب.. لا هو الاتنين

دا مش لأني فيا شيء لله.

بس خلاص.. بقينا زي الأم الحامل اللي عارفة هاتخلف ايه مسبقا

فرحة الانتظار راحت

فرحة المفأجاة راحت



دخلت قبل كدا في نقاشات هبلة كتير من بتاعة امريكا هي اللي بتقول رمضان امتى عشان نبقى مختلفين

بس خلاص مش فارق

اول يوم رمضان و صلاة التراويح، حلو انك تشوف الناس كلها بتصلي

بس المشكلة ان مش كل الناس بتصلي



حلوة اللمة في رمضان.. بس المشكلة برضو ان في ناس بتقدر ما تتلمش في رمضان

و تقولها يا عم دي صلة رحم.. يقولك صلي على النبي.. دا ابن كذا و كذا

و دا ممكن يبقى ابن بيتكلم عن ابوه او اب بيتكلم عن ابنه

بقينا جاحدين اوي

حتى تجاه انفسنا

يعني رمضان شهر واحد في السنة

اقتل نفسك عشان تعديه

قليل ما تلاقي حد حاطط مخطط صح عشان يعيش رمضان

اللهم الا جماعة التلفزيون و تمنتاشر مسلسل مصري بس السنة دي

و الفلوس بتروح فين؟



انا نفسي السنة دي اسهر وقت السحر

اقول لربي..

نعمك كتير اوي عليا..

الحمد لك

و الشكر لك



وحشني ابكي بين ايديه

........................





رمضان كريم

حالة..

وحشتني نيران..

مش عارفة ليه جت لي حالة خرس من بعد آخر بوست، مع اني كل يوم قبل ما انام تيجي في دماغي افكار جديدة اوي

تكاد تكون حلوة لحد كبير، بس في شيء متخلف بيمنعني من الكتابة

مش كسل، و مش تشتت..مش عارفة

يعني مثلا كان عندي تعليقات اكثر على موضوع العبارة و احنا اللي عاملين زي عود الكبريت، يهب يهب، و يطفي لوحده لو ماحدش طفاه

و بسرعة ما يولع بسرعة ما يطفي

كان عندي تعليقات مهمة اوي على كم العبط اللي في البرامج الكروية اللي بقت اكثر من الهم على القلب، و كل يوم و التاني ليهم قضية، يحسسوك فيها انها قضية وطن،ابتداءً من أزمة الحضري، مرورا بمشكلة الزمالك او مشكلات الزمالك ، عبوراً على مشكلة الأهلي و بث المباريات، ومين احترف فين و ازاي،و الغريب ان لو جمعنا مجموع الساعات اللي بيتم بث البرامج الرياضيا فيها، دا في القنوات غير المتخصصة تلاقيها كتير اوي

طب ليه، بالعقل، الكورة لا بتأكل ولا بتشرب

و لا الرياضة حتى متاحة لكل الشعب..و بعدين لعيبة الكورة اللي بياخدو ماشاء الله ماشاء الله كتير اوي فلوس، بيعملوا ايه للبلد

بلاش كلام فارغ، شوفوا القضايا الأساسية الأول و بعدين اتكلموا

و بعدين الملاحظ ان القضايا بتسلم بعض، و كأن في يد عليا بتمشي الأمور عشان تفضل الناس متعلقة و مشغولة.

المهم

و أخيرا حريق مجلس الشورى، اللي ولع و ماحدش عرف يطفيه.. خيبة تقيلة، و طبعا مش هانتكلم على الفساد واللذي منه

على الرغم من دا كله مش باكتب

مع اني بقى عندي نت في البيت، و سهل اني اكتب.

المهم بردو

اديني كسرت الحاجز و رجعت اكتب تاني

رمضان قرب، احلامي في رمضان دا كتيرة اوي

و ان شاء الله هاخرج بيها كلها متحققة

انا ماكنتش كويسة بما فيه الكفاية رمضان اللي فات.. على الرغم من ان ربنا دايما بيكرمني و الحياة بجد حلوة بنعم ربي عليا

بس

انا عارفة نفسي انا ماكنتش كويسة

دا انا حتى ماكنتش زعلانة اني مش كويسة، كان في حالة من البلادة كدا

رمضان دا انا ان شاء الله احسن

و طمعي في ربنا كبير اوي، عشان هو كريم، و انا مجرد أمة..

هو ليه عبيد غيري كتير اوي، و في غنى عني

بس انا ماليش غير رب واحد، عارفة انه اكرمني و بيحبني..

عشان كدا كل ما اغلط.. ارجع له هو تاني

عشان ماليش غيره

يا رب دموعي تكفي ذنوبي

و يا رب قلبي يتعلق بيك اكثر

يا رب انت عارف ان نفسي أمارة بالسوء، باستعين بيك يا ربي على نفسي

و على ذنوبي

و على الشيطان

يا رب سترتني كتير اوي.. اوي

اتم سترك عليا.. اللهم استرني فوق الأرض و تحت الارض و يوم العرض عليك

يا رب

يارب

كل سنة و انتو طيبين.

هارجع اكتب تاني