عندي حاجات كتير اقولها في رمضان
اولا لازم اقول كل سنة و انتو و انا و هم طيبين
بس في حاجة محشورة في زوري
هاموت لو ما قولتهاش..
علما اني صايمة والله
رمضان ما بقاش زي زمان
او احساس الناس برمضان مش زي زمان
حتى انتظارنا لرمضان مش زي الأول
يعني السنة دي مثلا .. كلنا بنتعامل و عارفين ان رمضان يوم الاتنين
اختي الصغيرة قالت لي يمكن الأحد او الاثنين
بصيت لها باستغراب.. لا هو الاتنين
دا مش لأني فيا شيء لله.
بس خلاص.. بقينا زي الأم الحامل اللي عارفة هاتخلف ايه مسبقا
فرحة الانتظار راحت
فرحة المفأجاة راحت
دخلت قبل كدا في نقاشات هبلة كتير من بتاعة امريكا هي اللي بتقول رمضان امتى عشان نبقى مختلفين
بس خلاص مش فارق
اول يوم رمضان و صلاة التراويح، حلو انك تشوف الناس كلها بتصلي
بس المشكلة ان مش كل الناس بتصلي
حلوة اللمة في رمضان.. بس المشكلة برضو ان في ناس بتقدر ما تتلمش في رمضان
و تقولها يا عم دي صلة رحم.. يقولك صلي على النبي.. دا ابن كذا و كذا
و دا ممكن يبقى ابن بيتكلم عن ابوه او اب بيتكلم عن ابنه
بقينا جاحدين اوي
حتى تجاه انفسنا
يعني رمضان شهر واحد في السنة
اقتل نفسك عشان تعديه
قليل ما تلاقي حد حاطط مخطط صح عشان يعيش رمضان
اللهم الا جماعة التلفزيون و تمنتاشر مسلسل مصري بس السنة دي
و الفلوس بتروح فين؟
انا نفسي السنة دي اسهر وقت السحر
اقول لربي..
نعمك كتير اوي عليا..
الحمد لك
و الشكر لك
وحشني ابكي بين ايديه
........................
رمضان كريم
Posts
5 comments:
حلو اننا نفكر الناس بتعمل اية ومش بتعمل اية في رمضان والاحلى اننا نعمل كل الحاجات اللى احنا عاوزينها
كل سنة وانتي طيبة
أوافقك تماماٌ على أن الأحساس بقدوم رمضان لم يعد كالماضي .. لا أعلم السبب ؟ هل لأننا لم نعد صغاراٌ أبرياء كالماضي ؟ أم لضغوط الحياه من حولنا في كل مكان ... ولكن يظل لرمضان بهجته رغم كل شيء
رمضان كريم يا نيران وكل سنة وأنت وكل من تحبين بكل خير
قبل ما اقول حاجة انا مش فاكرة ان كنت عيدت عليكي ولا لا بس لو نسيت سامحني انا حاولت اقول لكل الناس واكيد في ناس وقعت منى. على العموم كل سنه وانتي طيبة. اما بالنسبة للبوست بقه:
كل حاجة يا نيرو مبقلهاش طعم. حياتنا
بقت مؤرفه. انا مسيحيه اظن انتي عارفه ده. ومع كدة رمضان ده كان العسليه بتاعه السنه. كنت بستناه بفارغ الصبر فوازير ومسلسلات وسهر بالليل ومكسرات. دلوقتي التليفزيون بجيب برامج سخيفه تحرق الدم وبيقوللك السنه ديه انتجوا 40 مسلسل اتكلفوا 500 مليون جنيه
وكلها مسلسلات تجيب الغم والفقر وتضايق زيها زي عيشتنا بره وطبعاً المكسرات اسعارها دلوقتي تخلي كل ام تشيل لبنتها شوية مسكرات للجواز. ولازم حد يفتيلنا هي على العريس ولا على العروسة
غير كدة كمان طبايع الناس زي الزفت كل واحد عايز يظهر صايم انما روح الصيام والخشوع لربنا وفرحتك انك بصيامك ده بتحاول توصل لربنا شكرك على نعمه الكتير راحت. بس الكل بيجري والناس نازلة شرا وعايزين ياجلوا المدارس ويكسروا الاشارات في الشارع وخلقوا من رمضان ازمة زي ازمة رغيف العيش. مع ان في الصيام المفروض الواحد بينقطع عن الاكل شوية وبعدين يفطر على اللي موجود في البيت كانه اتغدا غدا متأخر. مش الناس تتدين والحكومة تصرف المرتبات بدري والناس تبقى عامله زي ما تكون مقبله على مجاعه. الناس بقت صعبه قوي يا نيرو
Love,
MishMish
عارفة لماق ريت كلمة وحشنى البكاء بين ايديك تقريبا التعليق الى كنت هاكتبة طار..
قتلتنى بحق
ربنا انت اعلم بنا من انفسنا فاهندنا واهد بنا
اتأخرت في الرد على التعليقات..
مش عارفة ليه.. مع اني كنت بادخل كل يوم اقراها..
ما علينا..خلي الكلام دا للبوست الجاي
غير معرف.. و انتي طيبة
أفندينا..بعد خمستاشر يوم من رمضان .. صدقني مش شايفة بهجته
مشمش،
صدقيني انا زيك نفسي اعرف الفلوس بتاعة المسلسلات دي كلها راحت فين
فاكرة فوازير شريهان و نيلي
فاكرة كانت حلوة قد ايه
فاكرة ليالي الحلمية
فاكرة.. و فاكرة و فاكرة..
يااه.. كان زمان
ما اتحرمش من مرورك..
و صدقيني مسلمة او مسيحية.. رمضان كان بيجمعنا كلنا
كلنا
يعني انا لا اذكر ان حد من زمايلي المسيحيين في الجامعة كان بياكل او بيشرب في نهار رمضان احتراما لينا
..
قال و يقولك فتنة طائفية
يتوكسوا بقى
تؤ.. اللهم اني صائم
الغزالي..
مرور مميز.. اشكرك عليه..
و تسجيل اعجاب واجب بمدونتك اللي ادمنتها
ربنا يهدينا جميعا..
تحياتي
Post a Comment