زادت عن حدها اوي..

في الواقع. و نخلي بالنا ان لما نبدأ بكلمة في الواقع تتوقع حاجات مهببة جاية..

ما علينا.. في الواقع انا كنت جاية و معايا بوست رومانتيكي من الهبل اللي انا باكتبه دا.. بتاع ضوء القمر و انا شمعة تحترق من أجل الآخرين و الكلام الفارغ اللي انا باهرتل بيه دا لما يكون عندي فراغ عاطفي.. و كما لاحظتم و لاحظت انا كمان اني بطلت اتكلم خااالص في السياسة، و اكتفيت بدور المتفرجة على جهود الأخوة و الأخوات المدونين التانيين.. على كافة ميولهم.. و اهو الواحد بيقرا و بيلاقي حد بيعبر عن اللي هو فيه، و بالتالي الموضوع مش محتاجني انا كمان، يعني خيخة و سوسة و افندينا و شقير من ابرز الناس اللي باروح عندهم كل شوية اشوف ايه اخبار السياسة و باحس انهم قالو اللي في قلبي و خلاص.

طب ما خلاص بارغي ليه انا بقى كل الرغي دا..

انا مش جاية اتكلم في السياسة في حد ذات عينها يعني.. خصوصا في ظل المؤتمر المش عارفة كام للحزب الوطني و فكر جديد لمستقبل بلدنا بس انا ليا كام تعليق على قدي مع اني لا ادعي اني بافهم حاجة في لعبة الكذب الكبيرة اللي اسمها سياسة دي.. بطلي رغي يا نيران ضيعتي المشاهدين منك

المهم..كل الناس اتضايقت من المهرجين اللي طلعوا اتكلموا في مؤتمر الحزب الوطني و شعارهم بتاع فكر جديد لمستقبل بلدنا. انا ليا وجهة نظر ظريفة شوية.. الناس بتتكلم بصدق والله يا جماعة.. هم بيتكلمو عن السياسات و اللامركزية و الاقحوانية و البطيخية بتاعة بلدهم/ ايوة مهم اصلهم بيتكلمو على بلد تانية غير مصر دي.. اصل انتو مش عارفين، احنا عايشين في عوالم متوازية.. يعني في عالم تاني في بعد تاني فيه مصر بردو و مصريين و كدا.. بس العالم التاني الناس اللي في مصرهم عايشين في رخاء و اصلاح اقتصادي وبيحبوا الريس بتاعهم اللي هو قاعد عندنا بالغلط دلوقت، و شوية و هايلاقي الة الزمن اللي تنقله العالم المتوازي و تاخده هو و مهرجيه و كل الشلت اللي كانت قاعدة على الكراسي و الحيزبونات و الحيزبونون اللي كانو بيصقفوا ،، انتو ما بتتفرجوش على ام بي سي فور ولا ايه.. شوفوا تشارمد كدا، و انتو هاتفهمو.. و بلاش نظلم الناس، يعني الراجل احمد عز كانت هاتجيله يا عين امه جلطة في صوباع رجله الصغنن و هو بيقول اننا مش عارفين مصلحة البلد، و في الاخر بيقول عجبي، شفتو عجبي دي.. نعذرهم نعذرهم حبة و هايروحو بلدهم.. بس يا رب عنابة ترجع بآلة الزمن..قولوا يا رب، و بعدين هانبقى نقول مين عنابة دي

كل اللي فوق دا بقى ولا هز لي شعرررررة من الكام شعراية اللي في نافوخي.. اطلاقا.. ابسلوتلي..

اللي قتلني بجد

قصة اسلام بدر.. الله يرحمه و يصبر اهله

وقصة خديجة بتاعة مدرسة احمد عرابي..

ازاي حادثتين زي دول يمروا كدا مرور الكرام..

طفل في عمر البراءة و الحلم. يقتل.. مش في فلسطين و هو بيدافع عن وطن و ماسك حجارة قدام دبابة يهودية..

لا اطلاقا.. دا على ايد معلم..مربي اجيال..

قد يكون المعلم انفعل و طلع عن طوره.. بس انا مش قادرة انسى صورة اسلام.. الألم اللي حس بيه قبل ما يموت.. الرعب اللي حصل له من نظرات مدرسه، مش قادرة اتخيل نفسية اللي معاه في الفصل،

مش قادرة اتخيل المدرس دا قادر يعيش ازاي..انا مش مشفقة عليه.. بس انا عارفه انه مش شرير بالفطرة..

مش عارفة بلدنا دي موديانا لفين

طب اللي كانو بيتعذبوا في اقسام الشرطة كان في فريق من الناس بيقول اصلك ما تعرفش دول عملوا ايه و سووا ايه..

اسلام و خديجة عملوا ايه

ازاي اامن اودي ابني مدرسة

ازاي اامن ان ابني ما يموتش من الرعب عشان واجب..

خديجة ماتت من الرعب لما المدرس قال اللي ما عملش الواجب يقف..

يا ترى كان شعورها ايه قبل ما تموت..

يمكن في مصايب اكتر من دي في بلدنا مش بلدهم..

بس بجد والله العظيم الموضوع زاد عن حده

زاد اوي