كنت جاية و ناوية اكتب المقدمة بتاعة وحشتني نيران و بقالي كتير عايزة اكتب و الكلام اللي سمعته من نفسي بتاع سبعتاشر مرة بعد المية..
بس سيبكم من دا كله
انا جاية و في بالي ذكريات الطفولة
اه انا كنت طفلة و ربنا
طفلة كبيرة بقى ولا صغيرة مش مشكلة
اهو طفلة و خلاص
كنت كلبوزة.. عسولة.. ولازلت
كان ليا عدوة لدودة
كنت باشوفها شبه الدودة
من ساعة ما جت و هي واقفة في زوري
و قال قالولي ايه دي اختي
و خلي بالك منها يا نيرو و اقعدي وياها يا نيرو
بس نيران كانت بنت جنية
ترن البت كل علقة و علقة انقح من اللي قبلها
لا و الجبروت تقولها.. اياكي تقولي لبابا و ماما
امي كانت ام عاملة.. ولازالت
و بعيد عنكم كانت بتسيب معايا اخواتي الصغيرين
كلهم خد دوره طبعا.. بس اللي كانت في قفايا على طول دي اخدت السواد الاعظم من .. مش كره
بس هي مشاعر تنم عن حد بيسلب طفولتك..
انا كنت طفلة و عايزة اعيش.. و مش فاضية للكلام دا بتاع خلي بالك من اختك و الكلام الفارغ دا
و تمر السنين و هي تكبر و انا كمان بالطبع
و يكبر بينا شعور غريب
اخوة.. يمكن
بس اعمق شويتين
يمكن همومنا المشتركة خلت بيننا لغة صامتة. فاهمين بعض من غير كلام
كبرت في حياتي اوي
من غير ما نحس
كأننا مولودين كدا
توأم و يمكن اكتر
بعدت عنها و اتغربت عشان الدراسة في الجامعة.. و لكن لما كنت بارجع لها كنت باشيل كل الحواديت جوايا عشان احكيهالها
لا دا انا وصلت ان كل لحظة اعيشها اشوفها معايا
تقولولي عادي مهي اخوة
اقول ماشي.. بس جميلة
اجمل بكتير من حاجات كتير
حتى ذكرياتي المريرة معاها..بقت جميلة
بقينا اصحاب
حلوين اوي
و عشانها باكتب لها البوست دا كله
عشان اقولها باحبك اوي
و حروفي من غير عينيكي مالهاش معنى
و تعليقك عندي يعني كتير اوي
انتي مش بتغيبي عني
كل تفصيلة في حياتي باشوفها مرة بعيني و مرة بعينك
لما بامر على الحاجات اللي بتحبيها باشوفها بعينك
دا انا حتى باتفرج على اي ار عشانك
بس معلش حاولت اتفرج على افلام رعب عشان انتي بتحبيها .. اسمحي لي ما نفعش
البت دي يا اخوانا طالبة في كلية الطب
في سنة...
عسولة
سمرا و عينيها واسعة
بتدورعلى كريم عبد العزيز في كل حتة :)
قلبها طيب و كتوم
غلسة و حنينة في نفس ذات اللحظة
بتحب افلام الرعب موت.. دي هي ممكن ترعب افلام الرعب
دمها شربات زيي
بيني وبينها سنين.. مالهاش معنى عشان عقلها كبير
بتلبس هدوم كتير اوي
يعني بلوزتين و جيبتين و بنطلونين
مش عارفة ايه الحكمة في كدا طبعا.. بس يمكن عشان الدولاب زحمة
اه منظمة اوي.. لدرجة تخنق
بتحب ام بي سي فور واكشن و مش عارفة شافت ام بي سي ماكس ولا لا بس ممكن تحبها
بتعرف تعمل اكل عسل
و ممكن تتصل بيا دولي عشان تسألني الفراخ البانية بتتبل ازاي
عصبية
بس مش متحكمة
قنوعة
اقتصادية
بتحب اللون البنفسجي
احيانا بتكون سوداوية في كتاباتها
رومانتيكية
جد
انا افخر انها اختي
و انا افخر انها هاتكون داكتورة قاااد الدنيا
و انا افخر اني باحبها الحب دا كله
و انا افخر ان حروفي دي ليها.. لوحدها
عشان اقولها
هبة
باحبك اوي :)
Posts
4 comments:
مش عارفة اقول حاجة
عارفة لما يبقى الكلام مالوش معنى
عارفة لما يبقى نفسي اترمي في حضنك واقولك وحشتيني
عارفة لما اكون بحبك لدرجة الكلام يتكسف مني عشان مش عارف يعبر عنها
عارفة لما يبقى نفسي اعيط ومش عايزة عشان انتي مش معايا دلوقت
عارفة لما تبقي قاعدة في امان الله وفجأة تضحكي بجد عشان افتكرتي يوم كنا مع بعض فيه
عارفة لما احس ان كل كلمة باكتبها قليلة قوي في حقك
وكل كلمة انتي كتبتيها كبيرة قوي عليا
وحشتيني قوي يا اغلى واحب اخت وصديقة في الدنيا
وسامحي حروفي عشان مش عارفة تقول اللي تستحقيه
بحبك اكتر منك
هبــة
وحشتونا وانا مش عارف انتوا زعلانين ولا ايه المهم الاحساس ده عجبني قوي ويا ليت يكون بين كل الاخوات . يحسن انا واخواتي اجارك الله يمكن نتخاصم بالسنه ويمكن ننسى احنا كنا متخاصمين ليه
المهم ربنا يخليكم لبعض ويدوم المحبة ابقي طمنينا عليكي وسلامي لزوجك وابنك وسلامي للجميع
ربنا يحفظلك يا نيران لكل من تحبين ويخلي ليك أختك ولا يحرمكوا من بعض أبداٌ
بصراحة جداٌ وأعتقد أنك عرفتي دلوقتي إني قليل الكلام .... أعجبت بشدة بطريقتك في التعبير عن حبك لأختك وللشعور الذي بينكما وسلاااامي الخاص جداٌ لدكتورتنا العظيمة
خالص الود والتحية
بيبو حبيبتي..
انا بس كان هدفي والله اقولك باحبك..
ما اتحرمش منك يا عسل
فارسنا الشجاع..
لا مش متخانقين.. بس هي في بلد و انا في بلد.. خطر علي بالي اقولها باحبها قدام الدنيا كلها
ربنا يهدي سرك انت واخوانك
افندينا
تشكرات افندم على زيارتكم الكريمة
اعتقد ان سر وصول كلامي لقلبك و اعجابك ليه
انه من قلبي
اوي..
و صادق بكل ما فيا من شعور
:) تسلموا على المرور
Post a Comment