موضوع الحضري.. وبس

السلام عليكم..

أعود بعد غياب كتير اوي اوي.. لظروف.. متضايقة..

مع اني كنت فاكرة اني اول ما اعمل مدونة مش هابطل كتابة.. لكن نعمل ايه بقى لوجع الصوابع

المهم عشان مش عايزين رغي..
انا اعلنها و أشدد انا مش بتاعة كورة يا اخوانا
و ماما قالت لي ما تتكلميش في السياسة
بس الصراحة بقى الموضوع اليومين دول زاد عن حده اوي اوي اوي
و بقى لازم اتكلم.. و اتكلم بجد
و على رأي حبيبتي اللي عمري ما قابلتها بس باحبها اوي سوسة المفروسة
احيانا الكلام بيطلع من المرارة
بس زي ما اتفقنا.. ماما قالت لي ما اتكلمش في السياسة
يبقى مش هانتكلم في الأوضاع الراهنة في الشرق الأوسط (حلوة اوي نشرة الجزيرة دي)
مش هانتكلم على غزة و احنا و المخطط اليهودي
و مش هانتكلم عن قضايا التوريث و خلافة
و مش هانتكلم عن النائب اللي اتمنع من حضور جلسات البرطمان عشان قال الشرطة تربحت من حملات الحج
و مش هانتكلم على قضية احمد عز (بتاع الحديد مش القمر عشان ماحدش يفهمني غلط)
و مش هانتكلم في الأوضاع الداخلية اللي بتتدهور كل يوم عن التاني
و مش هانتكلم عن أسعار الحاجة اللي غليت غليان مش طبيعي
و مش هانتكلم عن مطار قنا اللي عايزين يشيلوا عشانه تلات الاف فدان مستصلحين عشان يعملو مطار..اصل مافيش صحرا يعني
و مش هانتكلم عن نكتة طلب بتوع الشرطة لزيادة لرواتبهم و ان المفروض يتصرف لهم بدل عدم نرفزة
و مش هانتكلم عن موضوع دكاترة الجامعات اللي صدر قرار من وزير التعليم الواطي اااقصد العالي وقال مافيش زيادة و يخبطوا راسهم في الحيط
و مش هانتكلم في صاحبنا اللي بقى عنده سبعمية سنة و رايح يلف على الرؤساء يغير جو و يناقش القضايا العربية
و مش هانتكلم عن معنى ان الصحف الدنماركية تنشر تاني الرسوم المسيئة لحبيبي محمد صلى الله عليه و سلم
و مش هانقول اننا خدنا على قفانا عشان رجعنا في المقاطعة بدون ما يعتذرو رسمي و اهم بيدونا على قفانا تاني
عشان زي ما قلتلكو ماما قالت لي ما اتكلمش في السياسة
و انتو مش عارفين ماما بقى
دي لما بتزعل مني، ربنا بيعمل فيا حاجات مش حلوة

لكن انا انهاردة هاتكلم و غصب عني عن موضوع عصام الحضري

مش شايفين ان الموضوع اخد اكبر من حجمه بكتير
يا جماعة دا انا خايفة دلوقت افتح الحنفية بتاعة بيتنا الاقي اتنين محللين بيحللوا موقف الحضري

دا ساعة غزة ما حصلش كدا

انا باكتب و اقول، عصام الحضري (بيشتغل) في نادي الأهلي
مافيش وفاق بينه و بين جوزيه
جاله (عقد عمل) برة
قال لنادي الاهلي
قالوا لأ
الراجل عايز يشوف لقمة عيشه
ساب البلد و مشي

مش لوحده.. مااشي.
بس ما اخدش في جيبه فلوس البلد
ما وردلناش اكياس دم ملوثة
ما غرقش ناس في عبارة
ما منعش نعمل كوبري مع اللي جنبينا بدل الناس ما تموت في العبارات
ما احتكرش الحديد
ما غلاش الأسمنت
دا حتى ما غلاش سعر إزازة الزيت
ما عذبش حد في اقسام شرطة كروية
ما عملش فيلم خليع
الراجل سافر يشوف اكل عيشه
و يجيب له جوز ساعات
هو عمل دا صح ولا غلط، مش مشكلتنا.. هو حر

النكتة بجد بقى هو التضخيم الإعلامي غير العادي للموضوع
لا و الأهبل من كدا ان يترفع دعوى قضائية بسحب الجنسية المصرية منه

سؤال واحد بس..

هم كانو سحبوا الجنسية عن كل اللي فوق دول، و اللي قتلوا ناس برا و بحرا و جوا و حتى في بيوتهم

عشان يقولوا خدوها من الحضري..

انا ممكن افهم اننا كلنا نهتم بالكورة عشان جعانين فرح
بس
هل احنا فاضيين اوي اوي كدا ؟؟

نبيه الوحش المحامي (الفاضي ) رفع قضية و قال
وقال الوحش في دعواه "الحضري خالف القوانين التي وضعها الاتحاد المصري لكرة القدم والتي نظمت احتراف اللاعبين في الخارج ولم ينظر إلى الجماهير المصرية التي أعطت له الكثير وتركها وناديه الذي وضعه في مأزق حقيقي".وأضاف الوحش "أن ما ارتكبه اللاعب يعد خطأ فادحا في حق مصر بأكملها وليس النادي الأهلي فحسب وأنه لا يستحق أن يتجنس بجنسية البلد التي أعطته كل هذا ثم أختار أن يتركها ويهرب" مطالبا في نهاية دعواه بإسقاط الجنسية المصرية عن الحضري.

يا عم نبيه..خليك نبيه..

روح ارفع قضية على اللي سرقوا الناس و احلامهم و مستقبلهم و حتى ماضيهم و بعدين تعالى اتكلم

بذمتك يا اخي، انت لو جالك عقد احتراف في نادي مية غمر الامريكي، مش هاتروح؟؟


انا بجد مش فاهمة، حد فيكو فاهم؟؟