صناعة الأخبار

من يومين بس اتعلمت يعني ايه صناعة الخبر..

يعني ايه إعلام في الزمن دا

الموضوع كان ببساطة، الماتش اللي اتفرج عليه الملايين، الا و هو ماتش مصر و انجولا،

و رغم اني مش من مشجعي الكورة لا سمح الله،

بس الفكرة، اني مش كل ماتش هاتخانق في البيت عشان ما بحبش الكورة

اديني اتفرج و خلاص..

المهم

قبل المباراة في لقاءات بيعملها المراسل اللي اسمه تامر مش عارفة مين، و بينقلها للاستديو التحليلي اللي فيه المذيع اللي اسمه حمد و معاه طاهر ابو زيد و كابتن تاني مش عارفة اسمه

و طبعا انتو تحمدوا ربنا اساسا اني فاكرة اسم اي حد

المهم

العم تامر بيعمل لقاء مع الحج شوقي غريب

و شوقي بيقول كله تمام و فل الفل و التشكيلة فيها زيد و عبيد وفلان وعلان

راح الراجل تامر و قاله و محمد زيدان

قاله شوقي: محمد زيدان للأسف مصاب، لأنه في التدريب حصل له التواء في الرجل و حاولنا نعالج الإصابة و لكن ماكانش في استجابة

أن أن أن

هنا راح تامر الأهبل، مسك في الكلمة و قال لشوقي غريب اييييييه

قاله مافيش استجابة من زيدان؟؟؟؟؟

شوف الفكاكة، شوف الهبل المستحكم، شوف العبط

الراجل بيقول في اصابة و ماكانش في استجابة، تبقى استجااااااااااااابة مين يا ابن الذين انت ابنهم

المهم

شوقي قاله لأ طبعا الإصابة هي اللي ما استجابتش

قام ايه بقى الفتك التاني اللي في الاستديو اللي هو المذيع، بيلقي السؤال بلهجة استياء على طاهر ابو زيد و الكابتن اللي معاه و بيقول له ايييه

بيقولوه: كابتن هل ترى محمد زيدان تراجع او تخاذل انه يلعب هذه المبارة لصعوبتها

يااااااااااااااراجل

طب قول كلام غير دا، احنا هانستعبط ولا ايه

دا صاحبك الاهطل هو اللي قال الكلام العبيط دا يا ابني

و الراجل رد عليه في ساعتها و قال لأأأأ محمد زيدان مصاب، رجله ملوية، رجله ملووووووية

المهم طاهر قاله ايه: احنا مش عارفين هو استبعد خالص من التشكلية ولا من التشكيلة الأساسية، يمكن هو لسة في تشكيلة البدلاء..

و بعدين انا لا اعتقد ان محمد زيدان او اي من افراد الفريق المصري يتخاذل في تمثيل بلده في مثل هذه المباراة الحاسمة

قام الأخ عدنان ولا حمد ولا ابصر ايه دا قاله ما معناه خلاص بقى نشوف الموضوع بالتفصيل بعد المباراة

و فجأة يقول ايه، ان جاله تليفون من تامر،

يقوم تامر يقول ان محمد زيدان كان نازل يسخن و بعدين شالوه من التشكيلة خالص..

فطاهر ابو زيد قاله اهو يعني الراجل كان بيحاول و الإصابة منعته

راح عدنان ولا حمد دا يقوله هانشوف بعد المبارة

و بدأت المباراة و يعيني يجيبوا محمد زيدان و هو بيتكلم في الموبايل و زعلان،

و المهم الماتش عدى على خير

بعد مالماتش بقى جايبين محمد زيدان بقى نفسه يتكلم عن الموضوع

و تامر بيستعبط و بيقوله ايه،

طلعت إشاااااااااعة، واخدين بالكو من إشاعة دي،،

قال طلعت إشاعة بتقول انك تخاذلت عن المباراة

فمحمد بيقول يا عيني، اه فعلا انا جت لي تليفونات من اهلي في مصر بتقول ان المذيع بيقول اني ما استجبتش للمنتخب

انا هنا كنت هانط افط من لقلب التليفيزيون و اقوله هو دا المذيع العبيط اللي قال كدا

امسك في اضربه يا محمد

بس ما حصلش نصيب اني ادخل

المهم محمد زيدان شرح الموضوع و قال انا في التدريب رجلي اتلوت، و ما قدرتش العب

بس قبل الماتش اخدت مسكنات و ربطها كويس عشان انزل، بس ما نفعش

راح تامر بيقولوه سلامتك( يا شييييييييييييييييييخ)

الأدهى من كدا بقى ان عدنان ولا حمد ولا الكائن اللي كان بيذيع من الاستوديو التحليلي بيقول

شكرا لتامر انه عمل لنا لقاء مع محمد زيدان نفسه عشان ينفي الشائعات اللي طلعتها وسائل الإعلام

طب بذمة اهله هو في حد بينقل حصري البطولة دي غير الايه ار تي

يعني كدبوا الكدبة

و صدقوها

لا و رجعوا كذبوها،

و مصدقين ان هم بتوع الإعلام الهادف

...........................................

اهي هي دي بقى، صناعة الخبر على حق

جيب خبر، ألفه على لسان الضحية

سيب الناس شوية

و ارجع قابل الضحية،،

و حارب اللي بيطلعوا إشاعات

و عمار يا إعلامنا العربي

فين دوا الضغط بتاعي بقى؟