موضوع بدون موضوع

الموضوع انهاردة.. لا موضوع

انهاردة الفالانتاين.. ايه يعني

يعني عيد الحب بسخافاته اللي قولتلكم عنها من سنتين فاتو

بس الظريف ان السنة دي اللون الاحمر فيها مش زي كل سنة

لون الدم

مش عارفة ازاي ممكن ناس تحتفل بعيد الحب وسط كل الدم دا

بس عادي ممكن يكون ناس ما عندهاش دم اصلا.. مش مشكلة

انا مش مستنية وردة السنة دي.. ولا عمري استنيت ورد في الفالانتاين

ومش فاكرة اني جبت ورد.. جبت؟ والنبي ما فاكرة

السنة دي انا اتغيرت.. حسيت اني كبرت.. ولامؤاخذة عقلت

مش عارفة بس في حاجة اتغيرت

الحياة بقى ليها معنى اعمق و اتفه بكتير من ذي قبل..

اعمق لاني عرفت انها تافهة ولا تسوى حاجة والموت اقرب بكتير مما نتخيل وبياخد ناس مهمة اوي بدون ما نتخيل

فعلى ايه الواحد يقضيها في خلافات و صراعات و تفاهات مالهاش اي داعي

انا باكتب ليه انهاردة

مش عارفة، هي الكتابة لازم يبقى ليها سبب..

ممكن لمجرد الفضفضة

او لومجرد الفزلكة

او لاني وحشني اني اكتب

او لاني بحب نيران في المدونة.. و سبتها فترة و اخدني منها الفيس بوك وتويتر

بس التدوين له طابع اخر.. طعم حميمي اكثر

انا باحب هنا.. و عشان كدا انا هنا

طيب

انا بادعي ليل ونهار ان ربنا ياخد بشار لا مش بس ياخده دا يورينا فيه عجائب قدرته، لاننا بجد موجوعين اوي منه

عارفين يعني ايه حد يخلي حد يتمنى الموت من كتر التعذيب والرعب والقهر

انا مؤمنة ان اخواتنا في سوريا اقوى من الكلام اللي انا باقوله دا..

بس انا موجوعة لهم اوي

اما عندنا في مصر بقى، فحدث ولا حرج، انا ماعدتش فاهمة اي حاجة في اي حاجة

مش عارفة مين صح ولا مين غلط ولا مين فين رايح ازاي

الامور بقت مش واضحة اطلاقا قدامي

بس اللي واضح قدامي يقين ان ربنا مش هايخلينا نلمس السما بإيدينا وياخد مننا الامل

فإن شاء الله ربنا مش هايسيبنا

مصر دي بلد ربانية اوي، و ماحدش بيقول يا رب و ما يلاقيش ربنا جنبه

فيا رب بقى

انا لسة فيا شوية عيوب عايزة تتصلح

كتير مش شوية

بس كويس اني بقيت عارفاها.. وبقيت عارفة ازاي اتعامل معاها ازاي

اللي ناقصني اني اكمل شغل عليها

البيت والولاد

لا دا بقى في بوست تاني ان شاء الله :)

اقرو البوست بتاع هابي زلانطاين داي تاني على ايدكم الشمال من سنتين فاتو تقريبا

و ادعو ربنا يفك اسرنا كلنا من العبودية اللي معششة جوا نافوخنا

تحياتي

لا اجروء ان اقول صباح الخير و اطفال مثل اطفالي مروعين هناك في سورية

لا اجروء ان اقول صباح الخير و ام ثكلى لا تستطيع ان تغمض عنيها ألما على ما جرى لابنها، سواء في مصر او سورية

لا اجروء ان اقول صباح الخير و كل هذا الألم من حولي

ولكني استطيع ان اقول، يا رب يا الهي يا جبار، قد تجبر بشار فأره جبروتك يا حق و ارنا فيه عجائب قدرتك،

يا رب يا حنان يا منان يا ذا الجلال والإكرام اسألك باسمك الأعظم الذي اذا سئلت به اجبت و اذا دعيت به لم ترد دعوتنا خائبين، اللهم اظهر الحق و اعز من جاهد في سبيلك وفي سبيل رفع الظلم عن عبيدك،

ربنا نحن عبيدك بنو عبيدك بنو إمائك نواصينا بيدك ماض فينا حكمك عدل فينا قضاؤك، نسألك أن ترفع القهر عن قلوبنا، وأن تلهم الثكلى واليتامى والمكلومين الصبر والرضا و ان تنظر لهم بعينك التي لا تنام عين الرحمة الواسعة، و ان تثأر لهم فقد أوكلناك في أمرنا كله فأنت حسبنا ونعم المولى ونعم النصير

يا رب، إنا مغلوبون فانتصر، يا رب إنا مغلوبون فانتصر، يا رب إنا مغلوبون فانتصر

وصلِ اللهم وبارك على سيدنا محمد وعلى آله وصحبه و سلم تسليماً كثيرا

ش عارفة اقول صباح الخير، مش عارفة ابتسم، مش عارفة ابطل عياط، امبارح شفت مقطع استشهاد الطفل اسلام، قضاء ربنا وقدره وراضيين، بس دا طفل،طفل بريء، مات برصاص، يا ترى كان بيوجعه، يا ترى كان نفسه امه تحضنه قبل ما يفارق الحياة، يا ترى كان بيحلم بإنه هايعيش انسان ويموت انسان،
لا ويقولك اصلهم اطفال شوارع وما اتربوش لا اصل اللي باع وطن وجرف عقلياته على مدى تلاتين سنة لا ستين وحياتكو، هم دول اللي اتربو اتربو بقى انتو
لا اصل في مسار للديموقراطية، ديموقراطيتكو هاتدهسكو و هاتشوفو، بس يا رب قبلها تشوفو وتفرقو مابين الحق والباطل دا طفل يا ناس، جريمته الوحيدة انه اتولد في البلد دي، لا وفضل يعافر عشان يعيش، لا والاكادة لما شاف نور الامل مشي وراه،واللي يخليه يستحق الموت، انه نصر الحق
حسبي الله ونعم الوكيل. حسبي الله ونعم الوكيل. حسبي الله ونعم الوكيل. حسبي الله ونعم الوكيل. حسبي الله ونعم الوكيل

الجيش

يا صباح الخير يعني

سنة واربع شهور تقريبا ما كتبتش ولاحرف هنا

مر في السنة واربع شهور دول كتير اوي

نبتدي من الاخر

الثورة المصرية

اللي ما كنتش عمري احلم انها تحصل

دا انا كنت في اقصى اقصى اقصى احلامي

كنت باحلم ان حسني يموت واشوف رئيس لبلدي غيره

كانت الثورة حاجة منطقية

بس مش منطقية

منطقية عشان التجبر اللي كان بيحصل في البلد

والفساد

لا فساد ايه دا لو في كلمة اكتر من فساد كنت قلتها والله

دا الفساد دا كلمة حونينة تداعب الانفاس لما الواحد يسمعها كداهون

دا كان غول متوحش مستشري فاسد مفسد

ومفسد دي هي مربط الفرس

اصل النظام السابق الله لا يرحمه كان فاسد

عادي ما في انظمة كتير فاسدة

ايه الجديد

ايه الابداع يعني

كان النظام السابق يتميز انه فاسد في نفسه ومفسد لمن حوله وياعيني على اللغة العربية الفصحى

يعني عشان اي حد ينجح ويلعلع ويرعرع في النظام الفاسد كان لازم يفسد هو كمان

يعني ماحدش يقولي اني عصامي واحترامي والكلام الفارغ دا

كان فاسد ومفسد

المهم لما قامت الثورة انا كنت في مصر

بعد ست سنين فراق

عشت حبة فيها

شفت مصر اللي باحلم بيها

اينعم كان في حالة غليان، خصوصا في بيت تيتة

حيث هي بتحب حسني وشايفة انه كويس والله بس اللي حواليه هم اللي ولاد كلب

وشايفة ان ولاد التيت اللي في التحرير دول عايزين يخربوها

وطبعا تيتة ربت عماتي واعمامي فبالتالي دا رأيهم

اما مرات عمي اللي فيها الرمأ شوية

كانت بتقتنع لما بنفهمها بس ما بتقدرش تقتنع انها اقتنعت

المهم بردو

كل دا ماخلانيش اكتب

مع اني كنت في مصر

ومشيت في شوارعها

ومشيت في وسط البلد

هو اينعم يعني ما عرفتش اصيع اصيع

بس اهو على قد ما ربنا كرمني

المهم المهم

التدوينة دي ليه بقى

اصلهم قالو انهاردة اكتبو تدوينة فيها تعليقات على المجلس العسكري

واحب اوضح

اني مش عارفة اكتب حاجة

نظام حسني كان فاسد ومفسد

ولا شك ان في فساد في المؤسسة العسكرية

بس على رأي اللي قال ان حال الشعب المصري مع المؤسسة العسكرية زي الست اللي عارفة ان جوزها بيخونها

بس مش عايزة تعترف عشان ما تخربش البيت

انا باحب الجيش

والجيش مش الضباط الكبار

الجيش هو الجنود اللي ضحت بنفسها وبنسمع عنها معجزات في المعارك

الجيش هو الجنود اللي في عروقها نخوة من باقي العروق

الجيش هو الجيش

انا فاكرة اما الحرس الجمهوري نزل و انا من سذاجتي كنت فاكره انه الجيش

انا كنت بتنطط واقول لاختي اهو الجيش نزل

كدا خلصت

الجيش نزل وهايحمي المتظاهرين

انا فرحت بنزول الجيش اكتر من فرحتي بالتنحي

بس نفسي الجيش يرجع تاني ويقدر يتغلب على الفساد المستشري في المؤسسة العسكرية المصرية

نفسي نصنع سلاح

نفسي اسرائيل دي تترعب

هي مش محتاجة حرب مننا عشان نغلبها

دول ربنا القى في قلوبهم الرعب

محتاجة اثق تاني في قواتنا المسلحة

درع الوطن

انا خايفة ومش عارفة نروح لمين ولا نيجي لمين

بس هاقول يا رب

التدوينة دي مالهاش لازمة وعارفة ان غيري هايرصد حقائق كتير

انا بس عايزة اقول

اني عارفة ان المؤسسة العسكرية بتخون، بس مش عايزة اعترف عشان لو اعترفت كرامتي لازم تنقح عليا واخرب البيت

انا مش عايزة البيت يتخرب

مريم

شهرين و يوم

شعور غريب

الامومة مش مجرد شعور بالحنان

هي حاجة كدا مش عارفة بتطلع منين

مريم

كأني اعرفك من زمان اوي

مع انك يادوب كملتي شهرين و يوم

بنت يا مريم

نورتي الدنيا

من زمان اوي

مش مجرد من شهرين و يوم

خلافات زوجية!!

من اسبوعين تقريبا و الحاجة الوحيدة اللي كانت بتفكر فيها هي الطلاق!!

اه عشان مابقيوش زي الأول، كل واحد فيهم اتعلم يقسى على التاني.

الست دي مخلوق اهبل والله.. و بكلمة واحدة ممكن تتصلح حاجات كتير متكسرة، بس لما الكلمة دي ما تتقالش، بتتحول لمخلوق احمق و تختار الانتحار بعدا عن الحبيب

خلاف بسيط زي اي خلاف بين اي زوجين، مش مهم تفاصيله، المهم انه كان خلاف راقي. يعني لا صوت عالي ولا صراخ ولا حاجة

هي اختارت تبعد شوية بأدب، يعني لا هاتسيب البيت ولا حاجة كل الموضوع هايبقى الكلام على القد و بس، اكتر من كدا مافيش

هو سألها اول يوم مالك، قالت له تعبانة شوية

تاني يوم مالك، تعبانة شوية و مش قادرة اتكلم

تاني يوم قالتله بابا و ماما جايين يزورونا ،قالها انا ماشي و لما يمشوا كلميني او ابعتي لي ماسيج!!

ساب البيت و راح لأخوه

هي اتضايقت و كانت مش عارفة توجعه ازاي على الحركة دي

عشان هم كانو متفقين ان لو بينهم مصانع الحداد خلاف، ما حدش في الكون يعرف، و بعدين دا هي اللي زعلانة هو بيقلب الطرابيزة دلوقت عليها ؟

طيب.. و قررت انها مش هاتقوله ان ابوها و امها مشيو، و خليه في الشوارع

و تاني يوم رجع ما كلمتوش، وهو ما حاولش يكلمها

الشيطان فضل يقولها دا انسان اناني هو لو بيحبك كان قدر ظروفك الصحية و ضغط الشغل و هو لو بيحبك ما كانش سمع كلمة مامته لما قالت كدا مع انه عارف انه ما ينفعش وفكري كدا و دوري جواكي على اي حاجة هو عملها عشان يسعدك زي ما انتي بتسعديه مش هاتلاقي اي حاجة عشان تعرفي انه اناني

و هو فضل يفكر صاحباتها في الشغل غيروها و علموها تلوي بوزها في البيت، فين زمان اما كانت تيجي تصالحك و تقولك انا ما اقدرش انام و انت زعلان، اهي بتنام و بتشخر دلوقت و انت اتفلق، انت لو سمحتلها المرة دي انها تكسبك انت الخسران طول عمرك

الستات دول عايزين كسر ضلوعهم..

هي في اوضتها بالليل تفكر و تصعب عليها نفسها اوي و تعيط اوي اوي، و كل ما تسمع صوت تسكت و تقول اهو جاي يصالحني

وتعيط و تعيط

و تقوم الصبح تعبانة اوي و تروح المستشفى مع صاحبتها، و يقرروا يقعدوها في المستشفى يومين عشان اصلها حامل و الضغط عالي و غلط على الجنين

تقرر انها مش هاتقوله و تقول لصاحبتها قولي له اني مش عايزاه يجي لو سمحتي عشان لو جه مافيش عندي طلب غير ان كل واحد مننا يروح لحاله باحترام

لو سمحتي قولي له لو باقي عليا يسيبني لما ارتاح شوية

هو يتصل بيها مرة اتنين تلاتة ماتردش

و الشيطان يقولها على فكرة دا قلقان بس لحسن الناس تلومه، و هو خايف على ابنه مش عليكي انتي، فاكرة لما كنتي بتشتغلي في البيت و تعبتي و قالك لو انتي بطولك انتي حرة في نفسك بس انتي شايلة ابني

اه يبقى هو خايف بس على ابنه

تنام و تغمض عنيها و تسمع صوت خبطته على باب الاودة في المستشفى

تقرر انها اول ما تشوفه توجعه اوي و تقوله طلقني ، خليه بقى يعرف يعيش من غيرها

تسمع خطوات رجليه، و تقول مش هاعيط قدامه دا انسان اناني ما يستاهلش، خليه يندم طول عمره انه قسي عليا

تلمح ملامحه

تعيط اوي، و تشنهف اوي

يقولها والله انا اسف بس انتي غلطانة لما انتي زعلانة مني كلميني

قالتله و انت من امتى بتسيبني زعلانة كدا

انتي بقيتي حساسة اوي

انت بقيت قاسي اوي

خلاص انا اسف يا ستي، و ادي وردة عشان خاطرك ولو انك عارفة اني ما باحبش الورد

تضحك اوي من قلبها، قالتله و لاففها في ورقة جرنان كمان

مسح دموعها

لا بس انت غلطان انا اللي كنت زعلانة و انت تحرجني و تسيبني قدام بابا و ماما و انت عارف اني ما احبش حد يعرف عني حاجة

ششششش خلاص مش هايحصل كدا تاني بس انا كنت متعود يعني ان عمر ما خلاف بيننا يدوم كدا

مهو انت لو كنت جيت اخدتني في حضنك و خليتني اشتكيلك منك و اعيطلك الدمعتين اللي عندي كنا خلصنا.. انت عارف ان ماليش غيرك

و من غيرك باحس اني مكسورة

ماعنديش حد اشتكيله منك غيرك، بس ماكنتش قادرة اتكلم

وانتي عارفة اني عنيد و غبي. بس عارفة اني ما اعرفش اعيش من غيرك ،

و حضنوا بعض

و قالتله وحياتي عندك ما تقسى عليا تاني

و خلصت الخناقة

اللي سببها مش معروف و مش مهم يتعرف

بس اللي لازم يتعرف

ان بكلمة واحدة و لمسة واحدة بيوت كتير بتعيش !!

تغيير

للاسف اكتشفت اننا بنضيع كتير من عمرنا في انتظار تغيير ما يحدث في حياتنا
تغيير في ناس بنحبهم بس فيهم عيوب
تغيير في اوضاع مجتمعية
تغيير في اوضاع مادية
تغيير في اي حاجة
المهم تغيير
احيانا بيكون الاسهل ان التغيير يكون مننا احنا
بدل ما نستنى
و نسمع وعود
و نشوف دموع
و نوصل لمرحلة اليأس من التغيير
و دا بيولد جوانا الاحباط
و بيجيب لنا اكتئاب
و بيخلينا في حالة رفض للواقع
مع اننا مش متأكدين لو التغيير دا حصل حياتنا هاتكون احسن
يعني مش اكيد الاغنى احسن
ولا الاهدى في العصبية احسن
ولا الاقرب احسن
ولا الاكبر احسن
ولا الاوسع احسن
ولا اي حاجة على صيغة افعل احسن
يمكن يكون الواقع احسن بس نعرف نعيشه، بدل ما احنا عايشين على امل المش موجود
و بنعلق اخطاءنا و يأسنا و احباطنا على شماعة لو يحصل كذا، لو يبقى عندي كذا، لو يجرى كذا

دلوقت اكيد احسن لان دلوقت في ايدينا
بس يا ريت نلحق نعيش!!