ش عارفة اقول صباح الخير، مش عارفة ابتسم، مش عارفة ابطل عياط، امبارح شفت مقطع استشهاد الطفل اسلام، قضاء ربنا وقدره وراضيين، بس دا طفل،طفل بريء، مات برصاص، يا ترى كان بيوجعه، يا ترى كان نفسه امه تحضنه قبل ما يفارق الحياة، يا ترى كان بيحلم بإنه هايعيش انسان ويموت انسان،
لا ويقولك اصلهم اطفال شوارع وما اتربوش لا اصل اللي باع وطن وجرف عقلياته على مدى تلاتين سنة لا ستين وحياتكو، هم دول اللي اتربو اتربو بقى انتو
لا اصل في مسار للديموقراطية، ديموقراطيتكو هاتدهسكو و هاتشوفو، بس يا رب قبلها تشوفو وتفرقو مابين الحق والباطل دا طفل يا ناس، جريمته الوحيدة انه اتولد في البلد دي، لا وفضل يعافر عشان يعيش، لا والاكادة لما شاف نور الامل مشي وراه،واللي يخليه يستحق الموت، انه نصر الحق
حسبي الله ونعم الوكيل. حسبي الله ونعم الوكيل. حسبي الله ونعم الوكيل. حسبي الله ونعم الوكيل. حسبي الله ونعم الوكيل

الجيش

يا صباح الخير يعني

سنة واربع شهور تقريبا ما كتبتش ولاحرف هنا

مر في السنة واربع شهور دول كتير اوي

نبتدي من الاخر

الثورة المصرية

اللي ما كنتش عمري احلم انها تحصل

دا انا كنت في اقصى اقصى اقصى احلامي

كنت باحلم ان حسني يموت واشوف رئيس لبلدي غيره

كانت الثورة حاجة منطقية

بس مش منطقية

منطقية عشان التجبر اللي كان بيحصل في البلد

والفساد

لا فساد ايه دا لو في كلمة اكتر من فساد كنت قلتها والله

دا الفساد دا كلمة حونينة تداعب الانفاس لما الواحد يسمعها كداهون

دا كان غول متوحش مستشري فاسد مفسد

ومفسد دي هي مربط الفرس

اصل النظام السابق الله لا يرحمه كان فاسد

عادي ما في انظمة كتير فاسدة

ايه الجديد

ايه الابداع يعني

كان النظام السابق يتميز انه فاسد في نفسه ومفسد لمن حوله وياعيني على اللغة العربية الفصحى

يعني عشان اي حد ينجح ويلعلع ويرعرع في النظام الفاسد كان لازم يفسد هو كمان

يعني ماحدش يقولي اني عصامي واحترامي والكلام الفارغ دا

كان فاسد ومفسد

المهم لما قامت الثورة انا كنت في مصر

بعد ست سنين فراق

عشت حبة فيها

شفت مصر اللي باحلم بيها

اينعم كان في حالة غليان، خصوصا في بيت تيتة

حيث هي بتحب حسني وشايفة انه كويس والله بس اللي حواليه هم اللي ولاد كلب

وشايفة ان ولاد التيت اللي في التحرير دول عايزين يخربوها

وطبعا تيتة ربت عماتي واعمامي فبالتالي دا رأيهم

اما مرات عمي اللي فيها الرمأ شوية

كانت بتقتنع لما بنفهمها بس ما بتقدرش تقتنع انها اقتنعت

المهم بردو

كل دا ماخلانيش اكتب

مع اني كنت في مصر

ومشيت في شوارعها

ومشيت في وسط البلد

هو اينعم يعني ما عرفتش اصيع اصيع

بس اهو على قد ما ربنا كرمني

المهم المهم

التدوينة دي ليه بقى

اصلهم قالو انهاردة اكتبو تدوينة فيها تعليقات على المجلس العسكري

واحب اوضح

اني مش عارفة اكتب حاجة

نظام حسني كان فاسد ومفسد

ولا شك ان في فساد في المؤسسة العسكرية

بس على رأي اللي قال ان حال الشعب المصري مع المؤسسة العسكرية زي الست اللي عارفة ان جوزها بيخونها

بس مش عايزة تعترف عشان ما تخربش البيت

انا باحب الجيش

والجيش مش الضباط الكبار

الجيش هو الجنود اللي ضحت بنفسها وبنسمع عنها معجزات في المعارك

الجيش هو الجنود اللي في عروقها نخوة من باقي العروق

الجيش هو الجيش

انا فاكرة اما الحرس الجمهوري نزل و انا من سذاجتي كنت فاكره انه الجيش

انا كنت بتنطط واقول لاختي اهو الجيش نزل

كدا خلصت

الجيش نزل وهايحمي المتظاهرين

انا فرحت بنزول الجيش اكتر من فرحتي بالتنحي

بس نفسي الجيش يرجع تاني ويقدر يتغلب على الفساد المستشري في المؤسسة العسكرية المصرية

نفسي نصنع سلاح

نفسي اسرائيل دي تترعب

هي مش محتاجة حرب مننا عشان نغلبها

دول ربنا القى في قلوبهم الرعب

محتاجة اثق تاني في قواتنا المسلحة

درع الوطن

انا خايفة ومش عارفة نروح لمين ولا نيجي لمين

بس هاقول يا رب

التدوينة دي مالهاش لازمة وعارفة ان غيري هايرصد حقائق كتير

انا بس عايزة اقول

اني عارفة ان المؤسسة العسكرية بتخون، بس مش عايزة اعترف عشان لو اعترفت كرامتي لازم تنقح عليا واخرب البيت

انا مش عايزة البيت يتخرب

مريم

شهرين و يوم

شعور غريب

الامومة مش مجرد شعور بالحنان

هي حاجة كدا مش عارفة بتطلع منين

مريم

كأني اعرفك من زمان اوي

مع انك يادوب كملتي شهرين و يوم

بنت يا مريم

نورتي الدنيا

من زمان اوي

مش مجرد من شهرين و يوم

خلافات زوجية!!

من اسبوعين تقريبا و الحاجة الوحيدة اللي كانت بتفكر فيها هي الطلاق!!

اه عشان مابقيوش زي الأول، كل واحد فيهم اتعلم يقسى على التاني.

الست دي مخلوق اهبل والله.. و بكلمة واحدة ممكن تتصلح حاجات كتير متكسرة، بس لما الكلمة دي ما تتقالش، بتتحول لمخلوق احمق و تختار الانتحار بعدا عن الحبيب

خلاف بسيط زي اي خلاف بين اي زوجين، مش مهم تفاصيله، المهم انه كان خلاف راقي. يعني لا صوت عالي ولا صراخ ولا حاجة

هي اختارت تبعد شوية بأدب، يعني لا هاتسيب البيت ولا حاجة كل الموضوع هايبقى الكلام على القد و بس، اكتر من كدا مافيش

هو سألها اول يوم مالك، قالت له تعبانة شوية

تاني يوم مالك، تعبانة شوية و مش قادرة اتكلم

تاني يوم قالتله بابا و ماما جايين يزورونا ،قالها انا ماشي و لما يمشوا كلميني او ابعتي لي ماسيج!!

ساب البيت و راح لأخوه

هي اتضايقت و كانت مش عارفة توجعه ازاي على الحركة دي

عشان هم كانو متفقين ان لو بينهم مصانع الحداد خلاف، ما حدش في الكون يعرف، و بعدين دا هي اللي زعلانة هو بيقلب الطرابيزة دلوقت عليها ؟

طيب.. و قررت انها مش هاتقوله ان ابوها و امها مشيو، و خليه في الشوارع

و تاني يوم رجع ما كلمتوش، وهو ما حاولش يكلمها

الشيطان فضل يقولها دا انسان اناني هو لو بيحبك كان قدر ظروفك الصحية و ضغط الشغل و هو لو بيحبك ما كانش سمع كلمة مامته لما قالت كدا مع انه عارف انه ما ينفعش وفكري كدا و دوري جواكي على اي حاجة هو عملها عشان يسعدك زي ما انتي بتسعديه مش هاتلاقي اي حاجة عشان تعرفي انه اناني

و هو فضل يفكر صاحباتها في الشغل غيروها و علموها تلوي بوزها في البيت، فين زمان اما كانت تيجي تصالحك و تقولك انا ما اقدرش انام و انت زعلان، اهي بتنام و بتشخر دلوقت و انت اتفلق، انت لو سمحتلها المرة دي انها تكسبك انت الخسران طول عمرك

الستات دول عايزين كسر ضلوعهم..

هي في اوضتها بالليل تفكر و تصعب عليها نفسها اوي و تعيط اوي اوي، و كل ما تسمع صوت تسكت و تقول اهو جاي يصالحني

وتعيط و تعيط

و تقوم الصبح تعبانة اوي و تروح المستشفى مع صاحبتها، و يقرروا يقعدوها في المستشفى يومين عشان اصلها حامل و الضغط عالي و غلط على الجنين

تقرر انها مش هاتقوله و تقول لصاحبتها قولي له اني مش عايزاه يجي لو سمحتي عشان لو جه مافيش عندي طلب غير ان كل واحد مننا يروح لحاله باحترام

لو سمحتي قولي له لو باقي عليا يسيبني لما ارتاح شوية

هو يتصل بيها مرة اتنين تلاتة ماتردش

و الشيطان يقولها على فكرة دا قلقان بس لحسن الناس تلومه، و هو خايف على ابنه مش عليكي انتي، فاكرة لما كنتي بتشتغلي في البيت و تعبتي و قالك لو انتي بطولك انتي حرة في نفسك بس انتي شايلة ابني

اه يبقى هو خايف بس على ابنه

تنام و تغمض عنيها و تسمع صوت خبطته على باب الاودة في المستشفى

تقرر انها اول ما تشوفه توجعه اوي و تقوله طلقني ، خليه بقى يعرف يعيش من غيرها

تسمع خطوات رجليه، و تقول مش هاعيط قدامه دا انسان اناني ما يستاهلش، خليه يندم طول عمره انه قسي عليا

تلمح ملامحه

تعيط اوي، و تشنهف اوي

يقولها والله انا اسف بس انتي غلطانة لما انتي زعلانة مني كلميني

قالتله و انت من امتى بتسيبني زعلانة كدا

انتي بقيتي حساسة اوي

انت بقيت قاسي اوي

خلاص انا اسف يا ستي، و ادي وردة عشان خاطرك ولو انك عارفة اني ما باحبش الورد

تضحك اوي من قلبها، قالتله و لاففها في ورقة جرنان كمان

مسح دموعها

لا بس انت غلطان انا اللي كنت زعلانة و انت تحرجني و تسيبني قدام بابا و ماما و انت عارف اني ما احبش حد يعرف عني حاجة

ششششش خلاص مش هايحصل كدا تاني بس انا كنت متعود يعني ان عمر ما خلاف بيننا يدوم كدا

مهو انت لو كنت جيت اخدتني في حضنك و خليتني اشتكيلك منك و اعيطلك الدمعتين اللي عندي كنا خلصنا.. انت عارف ان ماليش غيرك

و من غيرك باحس اني مكسورة

ماعنديش حد اشتكيله منك غيرك، بس ماكنتش قادرة اتكلم

وانتي عارفة اني عنيد و غبي. بس عارفة اني ما اعرفش اعيش من غيرك ،

و حضنوا بعض

و قالتله وحياتي عندك ما تقسى عليا تاني

و خلصت الخناقة

اللي سببها مش معروف و مش مهم يتعرف

بس اللي لازم يتعرف

ان بكلمة واحدة و لمسة واحدة بيوت كتير بتعيش !!

تغيير

للاسف اكتشفت اننا بنضيع كتير من عمرنا في انتظار تغيير ما يحدث في حياتنا
تغيير في ناس بنحبهم بس فيهم عيوب
تغيير في اوضاع مجتمعية
تغيير في اوضاع مادية
تغيير في اي حاجة
المهم تغيير
احيانا بيكون الاسهل ان التغيير يكون مننا احنا
بدل ما نستنى
و نسمع وعود
و نشوف دموع
و نوصل لمرحلة اليأس من التغيير
و دا بيولد جوانا الاحباط
و بيجيب لنا اكتئاب
و بيخلينا في حالة رفض للواقع
مع اننا مش متأكدين لو التغيير دا حصل حياتنا هاتكون احسن
يعني مش اكيد الاغنى احسن
ولا الاهدى في العصبية احسن
ولا الاقرب احسن
ولا الاكبر احسن
ولا الاوسع احسن
ولا اي حاجة على صيغة افعل احسن
يمكن يكون الواقع احسن بس نعرف نعيشه، بدل ما احنا عايشين على امل المش موجود
و بنعلق اخطاءنا و يأسنا و احباطنا على شماعة لو يحصل كذا، لو يبقى عندي كذا، لو يجرى كذا

دلوقت اكيد احسن لان دلوقت في ايدينا
بس يا ريت نلحق نعيش!!

هابي عيد ثورة

طبعا زي ما انتو عارفين والعارف لا يعرف ان امبارح فيلم السهرة و كل سهرة كان فيلم رد قلبي بتاع علي و انشي، و ابوهم الجنايني
تبقى المناسبة السعيدة علينا جديدة هي ثورة تلاتة و عشرين يوليو و مصر اليوم في عيد مصر اليوم في عيد هيييه
اوم ايه بقى علي و انشي اتجوزو بعد ما الضباط الاحرار كوشوا على فلوس ابو انشي و قتلوا تقريبا الواد اخوها البرنس بس سابو لإنشي شوية مكوهرات اشكمنها تبع الواد علي ابن الجنايني
و عادي بقى انشي مش عندها حكد طبكي من اللي عند الناس و اتجوزت علي بعد ما ولعت الولية الرقاصة في حريق القاهرة اللي اكتشفوا ان سببه كان ماس كهربائي عمله واحد مجنون تبع تنظيم الاخوان المسلمين المتطرف الارهابي
جم الضباط الاحرار و قالوا تحيا مصر و خرج الشعب في الشارع و عم الحج الجنايني اللي كان اتشل من ابو انشي لما راح يخطب انشي و سمعه كلمتين في جنابه، المهم عم الجنايني خف من الشلل و قال معاهم تحيا مصر و اخو علي اتجوز بنت خالته الهبلة
و بعد ما الضباط الاحرار عملوا الشوية بتوعهم و خرجوا الحقد الطبقي اللي متغلغل في قلوبهم قعدوايقسموا التركة و اللي اخد قصر على النيل واللي اخد مجوهرات واللي اخد السلطة
يمكن كان في فيهم ناس نواياهم طيبة بس النتيجة اللي احنا شافينها دلوقت اكيد مش كويسة، لما كان الحكم بيتورث اهي اسمها مملكة و الملك حر، لكن دلوقت الحكم هايتورث ولاحدش هايقدر يفتح بقه و مهياش مملكة
زمان البشوات كانو ولاد ناس مأصلين، لكن دلوقت البشوات يا اما الهليبة والنهيبة اللي ماصين دم الشعب او ضباط الشرطة اللي تييييييييييييييت الشعب
زمان كان في احزاب على الرغم من انها كانت ملكية، و كان ممكن الناس تهتف سعد سعد يحيا سعد مع ان الملك ما اسموش سعد، و لما كانو بيهتفوا باسم سعد الملك ماكانش بيجيب سعد و يحطه في السجن ويروح اللي هتفوا في فندق ما وراء الشمس و يطلع عين ام اللي خلفوه
زمان كانو بيقولوا لو لم اكن مصريا لوددت ان اكون مصريا، دلوقت بيقولوا لو لم اكن مصريا لوددت ان اكون اي حاجة
زمان كان في تعليم، و كانت جامعة الملك فاروق جامعة فارقة في حياة الشعب
دلوقت الجامعات المصرية كلها لا تخرج الا المعاتيه الفاشلين، الا من رحم ربي و ببركة دعا الوالدين او يكون له حد في هيئة التدريس او حد من اهله من البشوات او البهوات

زمان اتحرقت القاهرة و قامت الدنيا و لم تقعد

دلوقت الحرايق دي سمة عادية في بلدنا و المطافي على بعد خرطوم ولا حياة لمن تنادي

زمان كان في اراضي زراعية على الرغم من انها كانت تبع الاقطاع، دلوقت الاقطاع موجود برده والاراضي الزراعية بح عشان بيبنوا عليها ملاعب جولف

زمان كان للعلم تمن، دلوقت العلم بقى يكيل بالبرنجان

زمان كانت مملكة بيحكمها ملك
دلوقت بقت تكية بيحكمها ولاد التييييييييييييييييييت

كفاية كدا والنبي لحسن هاطق
هابي عيد ثورة

قال بيقولك و إسلاماه قال..

قال بيقولك ايه يا خويا، في حرب زمان قامت بين المسلمين و بنو قريظة عشان قال ايه واحدة من المسلمين حاول واحد من اليهود رفع ثوبها فقالت و اسلاماه قام واحد مسلم في السوق قتل اليهودي فورا

فقتله اليهود فقامت الحرب و انتصر المسلمون على بنو قريظةوالنبي مش نكتة.. ..

قال حرب قال، طب دا احنا دلوقت بنتقتل و نتدبح و دمنا بيضيع هدر من غير ما حد يرفع حواجبينه مستاءًا و يقول يا حرام

بس اعتقد ان في فرق بين المسلمين زمان و دلوقت، الا و هو انه زمان كان عندهم خير اللهم اجعله خير إباء و عزة و كرامة و نصرة للإسلام و إيثار و يحبوا الله و رسوله اكثر من محبتهم لأنفسهم، حاجات كدا ما نوعاش عليها، يعني يادوب نسمع عنها في قصص السيرة او الاساطير

احنا بقينا رخاص اوي اوي اوي

ولاعادش لينا غير الشعور بالقهر!!