يا جزمة الهنا.. يا ريتني كنت انا

اول حاجة خطرت على بالي و انا باسمع الخبر

يا ريتني انا كنت الصحفي دا

و الخبر كما يعلم الجميع هو ان في مؤتمر صحفي للبعيد بوش و المتنيل المالكي

قام راجل ابن راجل و رمى بوش بجوز جزم ..

و لكم تمنيت لحظتها ان الصحفي دا كان من فصيلة ام اربعة و اربعين عشان يدي بوش تمانية و تمانين جزمة في خلقته

صحيح ان بوش ابن ال... عدى منها و تفاداها

بس المهم انه طاطى

خوفا من حذاء عراقي

لا و في الاخر يقول بوش ايه.. انه ماكانش خايف ولا مثل له اي تهديد

فاهمين فاهمين طبعا..

انا مبسوطة من الصحفي.. لان الجزمة دي كانت لازم تترمي في خلقة بوش من زمان

طبعا كلاب الامريكان في العراق طلعوا قالوا ان دا تصرف مش ولابد و انه لا يمثل الاعلام العراقي

لا طبعا هو يمثل الشعب العربي

انا مش عايزة اتكلم في السياسة والله.. بس الفكرة اني اتبسطت اوي

و اتمنيت اكون انا الصحفي دا

اللي مافكرش ايه اللي ممكن يجرا له بعد كدا

اللي ما خافش ان ولاده ما يلاقوش ياكلوا بعد ما يتقبض عليه

اللي ماخافش من اللي هايحصل في السجن اما يتقبض عليه

اللي ماقالش و انا مالي هو انا هاصلح الكون كله

اللي ماقالش يعني هو ضرب بوش بالجزمة اللي هايفرقٍِِ

اللي ماخافش من حاجة و عبر عن اللي هو عايزه

بغض النظر هو بينتمي لليمين ولا اليسار

سني ولا شيعي ولا مسيحي

كان يقصد ولا لا

المهم انه رفع جزمته على بوش

و جزمته دخلت التاريخ

على راس بوش :)

و عشان الحبايب زغرطي ياللي مانتيش غرمانة

لولولولوييييي