طب اللي ليهم نقابات بيطالبوا بحقوقهم!!

طب اللي عندهم شغل بيطالبوا بزيادة اجور

لكن مين هايطالب بحقوق اللي طلعوا على المعاش

مين هايطالب بحقوق المشردين في الشوارع

اللي مش لاقيين ياكلوا

اللي بجد بجد ما حليتهمش اللضا

اللي بيناموا في الشارع

اللي لا ليهم دعوة بإضراب ولا اعتصام

اللي حتى مالهمش حق الحياة

على فكرة

في بلد تانية في بلدنا

لا تعرف حاجة عن التعليم

ولا الحاجات الأساسية للحياة

ولا البنية التحتية و لا الفوقية

في اطفال في بلدي بيدوروا على لقمة العيش في الزبالة

في ناس احنا ناسينهم

في اطفال بيحلموا انهم يناموا في سرير، بدل نومة على الرصيف

متكومين، خايفين من رجل عسكري تديهم في ضهرهم تصحيهم

دول ما بيحلموش بالمستحيل

ولا ليهم دعوة مين الريس

ولا مين هايورث

ولا بمشكلة الإرهاب و لا بأمريكا

و في شيوخ.. عايشين على حد الكفاف

مش هاقول ياما ادو للبلد
و عمروها و يمكن حاربوا لتحريرها

بيروحوا يتعالجوا على حساب التأمين..
واللي ما يعرفش يعني ايه العلاج في مستشفى حكومي على حساب التأمين يسأل
دا طبعا بدون ما نتكلم على طول الاجراءات و المعاملات و البيروقراطية

و قليلاً ما تلاقي حد يحترم سنهم..

دول ناس مين يطالب بحقوقها؟
مين يتكلم بلسانها؟مين يحفظ لهم حق الحياة

يا رب

اللي بيحصل دا كتير اوي..

و النعمة اوي..

البلد دي رايحة فين؟ هايجرا لنا ايه


م فاكرين الناس هاتستحمل قد ايه؟


الناس قادرة تستحمل لحد امتى؟

طب ايه؟

نعمل معاهم ايه؟

وقال غالى - فى مقابلة مع برنامج "البيت بيتك" بالتليفزيون المصرى - إن الحكومة بحاجة إلى نحو 14 مليار جنيه لتغطية العلاوة الاجتماعية التى قررها الرئيس مبارك، مشيرا إلى أنه كان من الضرورى الحصول على هذه الأموال عبر طرق لا تخلق تضخم ينسف ما يتم منحه من علاوة.

وأشار وزير المالية إلى أن الإجرءات التى تم إقرارها الاثنين فى مجلس الشعب من زيادة أسعار البنزين والسولار والغاز للمصانع كثيفة الاستهلاك للطاقة والسجائر تسمح بتحقيق ما هو مطلوب من أموال وبسرعة وبأقل ضغط تضخمى.

عشان الريس يرتاح، هو مش قال لهم هاتو الفلوس دي تاني يا رجالة؟

وأشار إلى أنه لا توجد أى دولة فى العالم تبيع البنزين أو السولار أو الغاز أو أى من مصادر الطاقة بالأسعار التى يتم بيعها فى مصر، مضيفا أنه سيتم رفع الدعم عن الطاقة وإضافته إلى الأجور والسلع التموينية المدعمة والتعليم والصحة.


حد قاله ان مافيش دولة في العالم فيها الأجور اللي بياخدها الشعب، ولا في دولة في العالم فيها عدد الحرامية اللي عندنا، ولا في دولة في العالم بيحصل فيها القهر و القمع و السرقة و الخراب عيني عينك

و بعدين يا سيادة الوزير روح مون عربيتك بترول من السعودية ولا قطر ولا حتى سلطنة عمان، و روح شوف الأسعار فيها عاملة ازاي، و الخدمات فيها عاملة ازاي..

ولا هو ما يعرفش اي دولة في العالم غير اللي مربينه

وحول اختيارالحكومة لزيادة سعر البنزين، أوضح أن البنزين سلعة استهلاكية وليس سلعة وسيطة تدخل فى أى عملية إنتاجية، مشيرا إلى أن دعمه وأثره التضخمى كبير.
وقال إنه لم تتم زيادة أسعار البنزين 80 أوكتين لأنه يستخدم فى السيارات القديمة التى هى فى معظمها أجرة وسيارات تاكسى، مضيفا أنه تم فقط زيادة أسعار البنزين 90 و 92 و 95 ، حيث يتم بيع نحو 5 آلاف طن من البنزين 95 فى العام أما النوعان الأخران فيتم بيع مليونى طن منهما فى العام.

والله كتر خير اللي جابو الحكومة، اهم غلو البنزين النضيف على الناس النضيفة، و خلو البنزين المعفن زي ما هو للناس ال...

هو بسلامته ما يعرفش ان حتى لو الكلام اللي بيقولوا صح، يا جماعة لنفرض، طب عشان خاطري انا لنفرض جدلا عقيما انه صح، هو البنزين المعفن ابو رصاص دا مش بيسبب امراض و اتمنع في الدول اللي بتحترم البني ادمين ولا ايه؟؟

ااه احنا اللي مش بني ادمين

طب ايه بقى..

يعني دول يتعمل معاهم ايه..
يعني حلقت راسي مش بس كشفتها و دعيت عليهم دعوة ولية ساعة مغربية

و بردو مش نافع؟

يا رب، بلاش تاخدهم، بلاش تحرقهم، بلاش تولع فيهم بجاز عشان الجاز سعره غلي،

يا رب دعوتي و دعوة كل الناس، يا رب يشبعوا من السرقة بقى

يا رب يقولوا كفايةـ يا رب يقولوا كفاية

مش كفاية بتاعة كفاية استبداد و استعمار و استرهاب و استهبال و استعباط و استهطال

يا رب.. والله ما عاد لنا غيرك يا رب

قصة شعر

بعيداً عن الأجواء النفسية الملبدة ليا

و بعيداً عن الاجواء السياسية المنيلة بستين نيلة في سنتنا

و بعيداً عن فقعة المرارة على خروج هاني سرور و من والاه من القضية

و بعيداً عن الإضرابات و المحليات و اللذي منه

لأن الصراحة الكلام لا بقى يودي ولا يجيب ولا في امل إلا في ربنا يبدلنا بقوم خير مننا و خلاص
او ياخد اللي بالي بالكو

انهاردة قررت احدث حملة تغيير شخصية

صحيت الصبح، كالعادة بضرب الجزم

بصيت لوشي في المراية
جيت على نفسي و صبحت عليا و سألتني عن أخباري و صحتي و نفسيتي
و بعدين اتحاورت انا و نفسي في ضرورة احداث تغيير في المجتمع الدولي عشان الأوضاع بقت تتفاقم اوي

فتحت الراديو كعادتي الصباحية

عملت كوباية كابشتينو يا سونا اللي هو شاي بس انا بادلعه

و حضرت اللبس عشان اخرج للمعركة الحياتية اليومية

يوم عادي خالص اهو

بس بينما انا باعمل دا كله ، كان راسي شغال زي المكوك الفضائي في احداث تغيير في الحياة

اصل الحياة هي الحياة كل يوم، برضايا او غصبن عني هي هي

و قعدت افكر اغير الكون ازاي اغير الكون ازاي

لدرجة اني من كتر التفكير كنت هاشد في شعري عشان مافيش حاجة تغير الكون غير ان اللي قاعد على قلوبنا بقاله قرون دا يحل عن نفسنا
و دي حاجة في ايد ربنا وحده

قعدت افكر افكر افكر

و فجأتن، دماغي نورت زي اللمبة الالاووز
إشارة لوجود فكرة منيرة بنت منيرة

بصيت لنفسي في المراية على السريع
اديت شعري بوسة
لميتة و حطيت الطرحة

و جرررررررري على الحل

رحت للكوافيرة اللي جنب بيتنا و هي لسة بيفتحو

قالت لي : شعر ولا دقن يا نيرو

قولتلها: شعر

ضحكت و جابت المقص و قالت لي هاتساوي اطرافه كالعادة ولا عايزة تعملي ايه

قولتلها : لا هاشيله من جذوره و حتى الأطراف

بحلقت لي، قالت لي ايه

قولتلها اقولهالك بشياكة شوية: عايزة اقصة الا جارسون

قالت لي حرام ، قال يعني كان عندي شعر اصلا

و من هنا لهنا، خليتها توافق اخيرا انها تحررني

و قصيت شعري، يكاد يكون زلاباطة

شعور جميل اوي انك تعيش زلاباطة

فروة راسك تشم الهوا شوية

قفاك يشوف النور

مافيش كلاكيع تحت الطرحة

الدش يخلص في ثواني

الشامبو و البلسم يقعد كتير

و هنا واحد من الجامهور يسألني

و ايه علاقة شعر سعادتك المأسوف على جفافه بحل المشكلات الراهنة

اقوله يا مواطن، دا نوع من السيمبوليزم،اللي هو رمزية

انا لما اقص شعري زلاباطة ، و دا في الواقع مالوش اي علاقة بالواقع، فأنا بأرمز للحلول العبقرية اللي بتتحفنا بيها حكومتنا الحبيبة

اللي مالهاش اي علاقة بالواقع

غير ان قفانا يشوف النور اكتر

عشان.. انتو عارفين بقى

المهم، الحياة حلوة، و هي زلاباطة

حلم..

استيقظ رغماً عني
.. فهو يوم جديد..
رغماً عني

أقلب صفحات الصحف
بنكهة القهوة الصباحية
على عجل أبحث عن الخبر
لا أجد ما أبحث عنه
كل ما هناك..
معركات البشر


افتح زجاج نافذتي سامحة لنسمات الهواء أن تدخل..
فقد كان حلما
مجرد حلم

أنظر إلى عيناي في المرآة.. ألحظ فيهما انتفاخاً و احمرار
عجبا.. هل بكيت في الحلم
لا بأس.. فقد كان مجرد حلم..

سأتصل بكِ اليوم لأخبركِ كم أشتاقك
و لن أتوقف عن الاتصال بكِ أبداً..
لن أنتظر إلى أن يتأخر الوقت و يتحقق ذاك الحلم الخبيث

كم جميل أن تستيقظ من حلمك ..
لجد أنه كان حلم..
مجرد حلم

أن تعلم أن تلك الدموع..
و ذاك الألم بين الضلوع
لم يكن إلا مجرد حلم

لكن إذا كان حلماً..
لماذا اشعر بتلك الغصة في حلقي

يدق جرس باب..
إنه بائع اللبن..
يبتسم،
إنه يبتسم.. إنه مجرد حلم

أماني جارتي تلقي علي تحية صباحية
مشبعة بالشكوى من غلاء الأسعار
و من أن رغيف الخبز أصبح بكذا
و زوجها لا يجد عملاً إضافياَ بالمساء

لماذا أشغل بالي بالقلق..
فهاهي الحياة مستمرة..
مجرد حلم

يتعالى صوت آيات من القرآن
و للعجب أني أجزع من ذلك
أهرع إلى شرفتي
أنظر هناك لأجد ..
البائعون في الشوارع
و أصحاب المحال يفتحونها
و صاحب القهوة على الناصية يرتب كراسيها
و "يستفتح" بآيات القرآن لتحل عليه البركة
كعادته


الحياة.. هي الحياة

أفتح المذياع على عجالة،
و أرتدي ملابسي لأهم بالخروج

استرق السمع للأخبار
لا.. أنا لست قلقة
حتى المذياع لم ياتني بالخبر

أنتهي من قهوتي
أنظر إلى "الموبايل"

بيد مرتعشة ألج صندوق الوارد في الرسائل
فقط لأتأكد أنه كان حلماً
لن تكون هناك تلك الرسالة

"البقاء لله............

الأرض تدور...

اتحسس مكان قلبي..
ذاك الألم

لم يكن حلماً..
أنتِ رحلتِ

و ما بال ذاك العالم الأحمق

يشغل باله بالحروب و الكروب
و أولئك الأناس يبتسمون ..

كيف تستمر الحياة

و أنتِ هناك
و أنا لم أركِ

و لم أحدثك منذ وقت طويل
انهمكت في دوامة الحياة
نسيت نفسي فيها

صديقتي..
تحت التراب..
رحمك الله
.... و سامحيني

في المقهى

عادة لا أحب أن أضع الكحل في عيني حين أقرر أن ألقاك
لأني أعرف أني سأبكي
و حينها يتلطخ وجهي باللون الأسود
لكني اليوم قررت أني لن أبكي
و لأني لن أبكي فلن ألقاك
أشتاقك حقا
لكن
.........
لا رغبة اليوم لي في البكاء
أذكر ذاك المقهى المتهالك بالذكريات
كنت دائما ترتدي صمتك
و تسافر بعينيك بعيداً عن مدى رؤيتي
و تتركني مع دخان سيجارتي الوهمية
..............
أعلم أن الصمت أحياناً أبلغ من قصائد عصماء
لكني موقنة أن "عصماء" لم تكن شاعرة ذات يوم
لذا فأي قطعة من أدب
أبلغ من قصائد"عصماء"
...............

لماذا لم تمسك يدي ذات يوم
ألا أستحق ان أكون هناك
على الشاطيء الآخر من مدى رؤيتك
..................
هل كنت دوماً قريبة من عينيك
لدرجة أنك لم تلمحني ذات يوم
...............
أنا عادة لا أتناول الصمت على عشائي
إلا إذا كان صمتك أنت
وعادة لا أختاره من قائمة الأحاديث بيننا
بل هو الوحيد المتوفر لدي
..............
متى كانت آخر مرة قلت لي فيها أحبك
اياك أن تحاول اصطناع أنك تتذكر
لأنك لا تتذكر
أنت لم تنطق منذ رأيتك
...................
لماذا لا ترتدي اللون الأسود
لتكون رجلاً غامضاً
على الأقل حينها سأقول أني لا أفهمك
لأنك غامض

لماذا لا ترتدي إلا تلك النظرة
و التي تزيدك
سحراً

إياك أن تظن أني عشقتك يوماً
او أنني كنت أتهاوى على جدران صمتك
أو أنني تمنيت يوماً أن أرتمي بين أحضانك
و أبكي

إياك أن تظن أني أتألم عندما لا تلتقي عينانا

إياك أن تظن أنني أزداد حسرة
عندما انتظرك في ذلك المقهى
ولا تأتي أبداً

منذ عرفتك لم تأتِ إلى هنا بإرادتي

أنا لا أبكي عادة في الأماكن العامة
ليس لأني سأثير فضول الناس
و لكني لا أحب أن أبكي صمتًا

لم أطلب لك فنجان قهوة بدون سكر اليوم
لن تغضب، لأنك لا تحبها على أي حال
أتساءل كيف لا يعشق رجل مثلك فنجان قهوة مرة
و دخان سيجارة

أنت يجب أن ترتدي الاسود
أو الأبيض
فكلاهما كذبة الألوان
و يجب أن تعشق القهوة
و دخان السيجارة
و أغاني فيروز في الصباح
كما أنك يجب أن تطلق لحيتك
و تفتح أزرار قميصك العلوية
ويجب أن تكون عاشقاً لي
متيماً بي


و لتكن مستعداً
لأني لن أقبل بصمتك أكثر من ذلك

و لتعلم أنني في المرة القادمة
سأتمرد على صمتك

في المرة لبقادمة
سأسألك ما اسمك!!

آخر نكتة :)

يورومني‏:‏ الاقتصاد المصري ينمو أعلى من المعدل العالمي بـ 2% وهو الأفضل في الشرق الاوسط


القاهرة - محرر مصراوي - كشف أحدث تقرير أصدرته مؤسسة اليورومني بالتعاون مع وزارة الاستثمار ان معدل النمو الذي حققه الاقتصاد المصري ليس فقط أفضل من معدل نمو الشرق الأوسط وشمال إفريقيا ولكنه أيضا أعلي ‏2%‏ من معدل النمو العالمي.
دا على اعتبار ان نقص العيش و غلاء الأسعار و النهب و السرقة من مؤشرات معدلات النمو؟؟
ولا قصدهم على معدلات نمو الجريمة جراء الفشل الاقتصادي؟؟
ولا قصدهم النمو الاقتصادي للحرامية في البلد؟
اعتقد الأخيرة هي الجواب الصحيح

وأضاف التقرير أن معدل النمو خلال النصف الأول من العام المالي‏ 2008/2007‏ ارتفع إلى ‏7.5% بينما حقق الاقتصاد معدل نمو سنويا للعام الماضي بلغ 7.1%‏.
هو في نمو اكيد، بس اكيد مش قايلينه عشان الحسد

وأكد تقرير اليورومنى الذي أعدته المؤسسة بمناسبة اطلاق مؤتمرها الدولي بلندن حول مستقبل الاقتصاد المصري ويفتتحه الدكتور محمود محيي الدين وزير الاستثمار الثلاثاء ان هذا المعدل تحقق عبر الجهد الكبير الذي بذلته الحكومة منذ توليها المسئولية في يوليو عام‏2004‏ اضافة لجهود الاصلاح الاقتصادي وما حققه القطاع الخاص من طفرة في النشاط.
حول مستقبل الاقتصاد المصري بمناسبة ايه، و هم مال أهاليهم
و جهد ايه اللي بذلته الحكومة، إلا الجهد في سرقة أقواتنا
و السيد وزير الاستحمار، فين الاصلاح الاقتصادي اللي بيقولوا عليه
و فين الطفرة اللي في النشاط
ايه يا جماعة احنا بنتكلم على نفس البلد ولا ايه؟؟

وأكد التقرير أن الحكومة استطاعت تحقيق الاستقرار في الأسعار بالادارة المالية الحازمة وسياسة نقدية قوية وأيضا بالاصلاحات الملحوظة في القطاع المالي‏.
تحقيق ايه و لاموؤاخذة،

استقرار أسعار بالإدارة المالية الحازمة و سياسة نقدية قوية و اصلاحات ملحوظة؟

لولا ان المدونة دي ضد الألفاظ الخارجة، انا كنت قلت كلمة عيب بقى

انهي استقرار أسعار؟؟؟ هي نفس البلد؟؟



وأكد التقرير قدرات الاقتصاد المصري الكبيرة التي تعتمد علي التنوع من خلال القطاعات غير البترولية‏ مشيرا الي ان الصناعة تمثل‏32%‏ من الناتج المحلي الاجمالي والخدمات تمثل‏54%‏ عام‏2007/2006‏

وأشاد التقرير بقدرات قطاع الخدمات في مصر حيث أكد تقرير الاونكتاد لعام ‏2007‏ ان مصر في طليعة الدول المصدرة للخدمات المالية ومما يدعم استمرارية معدلات النمو المرتفعة الاستقرار في الاقتصاد الكلي والقدرة علي تخفيض عجز الموازنة العامة لأقل من‏7.5%‏ من الناتج المحلي الاجمالي عام‏2007/2006.‏

مين تقرير الأونطا كاد دا،
مصر ممكن تكون في طليعة الدول المصدرة للفلوس المهربة من البلد، آه و دي تعتبر خدمة مالية طبعا
انا مش بافهم صحيح


وقال انه بالرغم من ارتفاع الضغوط التضخمية في مارس‏2007‏ عن مارس‏2006‏ فإن عبء التضخم مازال معتدلا‏، حسبما ذكرت جريدة الاهرام.
لا تعليق لحسن انا اللي هايجيلي تضخم في المرارة

وأشاد التقرير ايضا بالسياسات المالية في مجالات تقليل العبء الضريبي والجمركي وسياسات البنك المركزي لإصلاح القطاع المصرفي وتحقيق استقرار كبير في سعر الصرف‏.‏
تقليل العبء الضريبي على الهليبة و الحرامية و كبار المستحمرين
لكن الشعب العادي، هايدفع ضريبة على الهوا اللي بيتنفسه

وأشار التقرير إلي أن هناك‏10‏ أسباب تدعو المستثمر العالمي للاستثمار في مصر أولها استقرار الاقتصاد الكلي ومعدل النمو الايجابي‏ ووجود قاعدة عمالية مدربة بأجور تنافسية‏ والسوق الاستهلاكية الواسعة‏ والبنية الأساسية المتطورة‏ وتنافسية النظام الضريبي والقدرة علي الدخول للسوق العالمية والتنوع الاقتصادي‏ وتحسن مناخ الاستثمار والاستقرار السياسي والاجتماعي

غلط، الأسباب العشرة هي ان الخير كتير و تعالى اغرف من بنوكنا و اسرق
و المسؤولين الفاسدين كتير، تعالى ارمي بياضك و كل القوانين و العقبات تتذلل
عمالة مش لاقية اللضا و ما هاتصدق انها تشتغل
الاستقرار السياسي و الاجتماعي، مافيش حد في البلد قادر يفتح بقه
الحق تعالى قبل ما الشعب يفوق!!!


و عجبي!!

بعد سقوط القتيل الرابع؟؟؟؟

بعد سقوط القتيل الرابع.. تنبؤات بسقوط الحكومة

و لما هاتسقط، هايجرى ايه


لما يغور باللي سرقه هايبقى ايه

مين هايرجع الناس اللي ماتت دي؟؟

مين هايدي الناس الميتة و هي عايشة الحياة


بجد بجد..

كتير اوي اللي بيحصل دا


و هايروح حرامي، و هايجي حرامي..
و لكل حرامي في بلدنا حامي

يحمي حماه، يسرق معاه
يديله سلطه، عزوة و جاه

و الشعب طيب ، ساكت مهاود
صامت، صامد ما يقدر يعاند


كله ساكت عايز ياكل لقمة عيش
و العيش انهاردة يا بيه ما تلاقيش


طابور العيش في بلدنا كفاح
قتال و دم ، جهاد و سلاح

و مفتينا المفدى قال كلام مفيد
اللي يموت في طابور العيش
في بلدنا شهيد

طب عايزين ايه في بلدنا زيادة
طلبتوا عيش ، ادوكم شهادة


مش من اللي بتتعلق على الحيطان
شهادة دي من اللي بتودي الجنان

جنان الدماغ، ولا جنان ربنا
مش مهم، احنا شعب مافيش زينا


يلا يا مواطن هيص و زيط
و بلاش سياسة و خليك عبيط


عيش يا مواطن عيش مبسوط
و لو زعلان هششششش اكتم صوت

حكومة نظيفة حكومة نظيف
نظفت ما خلت حتى الرغيف


و ادي الريس بكل الحنان
بيرفع معاناة عن مواطن غلبان

وأصدر أوامر عليا و قال للأهلي لأ حرام
خلي الحضري يسافر أوام

طب يا ريس و المطحونين
الغلابة الطيابة الغلبانين

بكل شفافية قال الرئيس
قلة مندسة بلاش تهييس
انا عارفهم، دا انا الرئيس

طب يا ريس و الأسعار
قال الريس، مية المية
دي طريقكم للعالمية

اشمعنا العالم كله لفوق،
و احنا تحت، يا شعب فوق

امريكا فيها ارتفاع أسعار،
عايزهم يقولوا عن شعبي حمار

طب يا ريس و المرتب
لالا يا شعبي، كدا هاتتعب

احمد ربك عل الي انت فيه
مش شايف في العراق و غزة بيجرا ايه

ناس مش لاقية تاكل يا شعبي
و انا صارف عليكو دم قلبي

يا ريس ما احنا مش لاقين ناكل
ولا حتى العيش حاف
اما انتو شعب نمرود صحيح

اتعشى نوم و شد اللحاف

يا ريس طب و بقيت القضايا

ما تقلقش يا شعب، و خليك ورايا

هاوديك لحد بر السلام
لحد قبرك فيه تنام


و تحلم بتغيير وزاري كبير

و يروح حرامي
و يجي حرامي
و لكل حرامي
في بلدنا حامي



كلام من المرارة