انا جعانة
مش جوع من بتاع الأكل
انا روحي جعانة
حاسة اني في حاجات كتير جدا.. مش لاقياها فيا
عاملة زي التور المربوط في ساقية
بس المشكلة ان حتى عنيا مش متغمية
عشان كدا انا دايخة من كتر اللف في الدايرة المفرغة
بقالي كتير مش عملت حاجة لنفسي انا
لنيران من جوا
انا باعمل المفروض و الواجب
و اللي عيب ما اعملوش
و اللي يرضي الناس
اللي مهما اعمل مش بيرضوا
بس انا نفسي اخد اجازة
من كل حاجة
حتى من عقلي
و اقرا حاجة جديد
حاجة من اللي .. من الحاجات اللي تاخدك من جوا اوي
توديك عالم تاني خالص
تعيش و تغضب و تفرح و تعيط
انا حتى بطلت اتفرج على التلفزيون
او بالأحرى، على حاجة باحبها في التلفزيون
و السينما.. غالباً ما شفتهاش بقالي كتير اوي
اوي
و كمان اوي
من كام يوم كنت باقلب بين القنوات
كان شغال فيلم ملك و كتابة
باحب الفلم دا اوي
بس ما اتبسطش
عشان كان لازم انام بدري
عشان اصحى بدري
عشان عندي شغل
و بردو من كام يوم
كان في الفلم بتاع ثورة الماتريكس
قلت اتفرج على حتة منه
بس للأسف، و للمرة المليون بعد الخمسمية الف
ما افهموش
عمري ما فهمت سلسلة الماتريكس كلها
مش مقتنعة يعني ايه احنا برامج و في فيروسات
و العوالم المتوازية
هو عيب اني ما فهمتوش لا سمح الله؟
نفسي في اجازة
بتاعتي انا لوحدي
و تكون يومين
يوم اقضيه في البيت
لوحدي
اعمل اللي انا عايزاه
بس اليوم دا ما يكونش يوم من ابو اربعة و عشرين ساعة
دا يكون يوم من اللي كتير اوي
و اقعد بقى اعمل اللي انا عايزاه
هاطلب بيتزا و اكل في البيت على راحة راحتي
مش هافكر اني هاتخن و ابقى كرنبة
هاكل كتير زي ما انا عايزة
و انا باتفرج على التلفزيو
اللي مش هالاقي في حاجة حلوة
هاقوم اخد كتاب من اللي باحبهم
فلنقل.. ذاكرة الجسد لأحلام مستغانمي
أو ثلاثية غرناطة
اه اه ثلاثية غرناطة
الرواية دي رهيبة اوي
هاخدها و اروح على سريري
اوضبه
و اخلي شكل الأودة مقبول
و اقعد اجيب . ايه اللي بيتاكل مع القراية
لا بيتشرب معاها
غالبا حاجة ساقعة
و لاني مقاطعة كوكا كولا
هايبقى..
هايبقى..
مش عارفة هابقى اتصرف ساعتها
بس اللي هاشربه هايكون بالتلج
عشان انا باحب التلج اوي
لا طبعا مش هاشغل موسيقى ولا اغاني
عشان مش هاعرف اندمج مع الكتاب
و بعدين لما اتعب من القراية
مش هانام لحسن لو نمت اليوم يخلص
هاقوم اشغل الكاسيت
على حاجة من اللي كنت باحبهم زمان
غالبا ماجدة الرومي
او الساهر
و اقعد اوضب اوراقي و حاجتي
و بعدين.. هاطلع في البلكونة
و اعمل لنفسي كوباية شاي بنعناع من اللي يزبط اجدعها دماغ
هاخد الرواية معايا
بس انا مش باعرف اقرا و انا قاعدة في البلكونة
يبقى هاخلي الرواية جنبي
و اقعد اتفرج على الناس
و يكون الجو حلو اوي
و قدامي منظر حلو اوي
و يكون في هوا
و يكون شعري طويل و ناعم و لونه..
مش مشكله لونه
و اقعد افكر
لا مش هافكر في حاجة مهمة
بس مش عارفة هافكر في ايه
هايجي على بالي اني اسمع راديو
عشان انا باحب الراديو اوي
زمان ايام الكلية كنت باسمع اذاعة البرنامج الثقافي
كانو بيجيبوا زمان
او ممكن يكونوا لسة يبجيبو بس انا مش باسمع
مسرحيات
من بتاعة هاملت و الأدب العالمي و الكلام دا
كنت باحبها اوي
و باحب اسمع المسلسلات الاذاعية
اه بس و انا باضبط الراديو هاخبط في اسمه ايه منير دا
اللي البنات بيكلموه من تحت البطانية
و يقولوا مشاكل هايفة اوي
من بتاعة
باحبه و مش بيحبني
او باحبه و هو بيحب مراتي اكتر مني
و اسامة يتكلم.. ايييييوة اسمه اسامة برافو عليكي يا نيرو
و اسامه يتكلم بردو من تحت بطانية
يقولها .. و تضيعي وقتك ليه معاه
دا متجوز
يعني ما حلتوش اللضا يا هبلة
هازهق من الهبل دا
عشان العالم مش بالتفاهة دي
و بالتالي هاروح لإذاعة البرنامج الثقاقي
و أنا رايحة بردو للبرنامج الثقافي هاخبط قبلها في البرنامج الموسيقي
هايكونوا بيقولوا عن السنفونية السبعتاشر للمعلم بتهوفن و اللي بيستخدم فيها التشيلو قبل ما يشلك
و بعدين اخيرا البرنامج الثقافي
هاقعد على السرير
و هاتروح عليا نومة
بس اليوم مش هايخلص
لسة في يوم تاني
هاقولكو عليه البوست الجاي
بس انت او انتي لو جالكو فرصة يوم اجازة، هاتعملوا ايه؟؟؟؟
Posts
8 comments:
والله انتي طلعتي حاجات كتير اوي جوايا..
زهقت من الدنيا و الناس و الروتين الممل و الشغل و الجوالنار و من هدومي ومن المطبخ و المواعين و من الشارع و المول ...
بس رغم كده سؤالك ده حيرني جدا..
قعدت افكر افكر افكر لو اخدت أجازة من كل حاجة حاعمل إيه؟؟؟؟ لقيت نفسي مش لاقيه حاجة اعملها..يعني الشغل و البيت و المواعين و الروتين حاجة مش وحشة..
عارفة انا نفس ايه ؟؟ اخذ اجازة بس يكون معايا الة الزمن و ارجع بيها للوقت اللي انا عايزاه..
بافكر ارجع لايام الكلية و اصحابي الكتييييييييييييييييييييييييير اوي و الضحك اللي من غير سبب و الرحلات والمحاضرات المملة ...
لأ انا احسن ارجع لايام الثانوي و غرفتي الصغيرة و بوسترات كاظم الي مالية الحيطة و الراديو الساعة 3 الفجر ومدرس الكيمياء الي شكله يموت من الضحك..
يااااااااااااااااااااااه
نيران لقد اشعلت نيران الذكريات و ايام الطفولة و السعادة بداخلي
على رأي الشاعر
ليت الشباب يعود يوما لنخبره بما "فعلت الغربة"
كل دة جواكي
اقولك اختصار
اقعدي كدة في اودتك وولعيلك عودين بخور
ونامي علي سريرك ومخدتك عالية
واقري رواية ذاكرة الجسد
لاحلام مستغانمي
هتلاقي نفسك
والله يا نيرو انا من رائي اني لو اخدت اجازة يعنى ودة طبعا من المستحيلات بالنسبة لشغلي المنيل احب ارجع الى سنة 67 ولا اقولك الى سنة 92 اعتقد فى الوقت دة كانت دماغي فاضية مفهاش اي حاجة غير انى ازاى اكون مبسوط وازاى اني اقضي يوم ظريف فى رحلة مع اصحاب اللى كانو كتير اوي واضحك والعب واعمل زي ما انا عايز مكنشي عندي هم ولا غم ولا تفكير فى الوضع الاقتصادي ولا كنت شايل هم طابور العيش والاسعار اللى بقيت مولعة ولا شايل هم اني اروح السوق علشان اشتري الخضار لاني مراتي هتضربني لو مجبتش السوق ولا مشاكل الموصلات والزحمة ولا مشاكل ان مرتبي موش بيكفينى لحد اخر الشهر والخ الخ الخ نفسي انسي كل الحاجات دي وتبقا دماغي مطرقعة زي زمان اعمل اللى انا عايزه
نفسي اروح اقعد فى مكان هادئ اوي ميكنشي فيها ناس كتيرة ومنظر يكون اكثر من رائع وكرسي مريح وصنارة وشمسية على بحر كدة ولا اقولك يا نيرو احب اروح الغردقة الجونة تحديدا انا قعدت فيها ثلاث ايام قبل كدة كانت ايام تحفة مع انها كانت ايام عمل موش فسحة بس كنت مبسوط خالص بس الكلام دة كان ايام حرب 67 دلوقتي بقا المكان دة تحفة فنية تحسي انك دخلتي لوحة فنية هائلة لا ازعاج لا حرق دم كل وقتي كان تامل فى جمال الطبيعة اللى ربنا خلقها كويسة لينا بس احنا اللى موش عارفين نستمتع بجمال الدنيا من كتر الهموم اللى حوالين
المهم ان الواقع المرير القطاع الخاص بيقول لو عايز تعمل فلوس يبقا موش تاخد اجازة وتفكيرك وجسدك وروحك فداء لشغلك ومفيش وقت للترفية احنا فى بلد انتاجي وللازم تكون انسان منتج وطبعا انا بحب اسمع كلام اللى اكبر مني وموش هعمل كدة تاني
كتكوت ناشف
عزيزيتي نونة..
صدقيني مش الغربة لوحدها هي اللي عملت فينا كدا
ياما ناس كتير في البلد زينا مربوطين في الساقية ، و اكبر مثال اخونا كتكوت مبلول
و صدقيني احنا اللي سجننا نفسنا في دوامة الروتين..
تعليقك اكثر من اسعدني..
ربنا ما يحرمني منك يا جميل.
سمراء النيل..
جربي انتي تقري ثلاثية غرناطة..
عالم تاني
على فكرة مرورك بجد اسعدني.. و يسعدني اني اقولك اني من متابعينك
:)
كتكوووووتي الناشف..
وحشتني يا كتكت.. و كويس انك ناشف عشان ما تاخدش برد و الفنوزنزا الطيور و كدا
:) انا لو منك..
اخد يوم اجازة
و اروح رمسيس
و اركب القطر
و من هنا على اسكندرية طواااالي :)
عند القلعة
اشرب لك إزازة آزوزة، و ارجع
انا لو مكانك.. اعمل كدا
تحياتي يا كتكوت
صباح الخير يا نيرووو اولا اشكرك على ردك الجميل دة واعرفك ان انا واخد مصل بتاع افلونوزا الطيور الحمد لله ثانيا انا فعلا نفسي اضرب يوم واطلع اسكندرية واروح عند القلعة مع اني معرفشي مكانها ولا عمرى روحت اسكندرية بس انا واثق في ذوقك العالي جدا اكيد المكان دة اللى انت بتقعدي فيها تكتبي فيها الشعر بتاعك والكلمات الرائعة اللى بنشوفها على الموقع بتاعك تهوس تجنن انا كدة اكتشفت موهبتك جت من فين بس اكيد مكان تحفة بس يا نيرو يا ترا في هناك حنطور ابو حصان 4 سلندر نفسي اركبه واشرب حاجة ساقعة هناك وقعد على البحر شوية وارجع بذاكرتي لورا خالص ايام حرب 67 فى نفس المكان دة قامت اول حرب فيها بس كانت حرب جميلة وذات مذاق خاص نفسي بجد بجد اكون هناك بس المشكلة معيش ثمن التذكرة ممكن ربع جنيه سلف يا نيرو وارجعه على اقساط
بوست جميل قوي
انتي خليتيني عايزة اقضي يوم زي ده بس امتى وفين
Love,
MishMish
Post a Comment